«Хабарныя» махляры на даверы

Источник материала:

Суд ды справа

Трое мiнчан, даведаўшыся, што адзiн сталiчны прадпрымальнiк хоча атрымаць участак у раёне Камароўскага рынку, прапанавалi сваю дапамогу ў вырашэннi зямельнага пытання. Прайдзiсветы, «узброiўшыся» падробленымi пасведчаннямi афiцэраў КДБ i МУС, доўга пераконвалi бiзнэсмена ў сваёй салiднасцi i наяўнасцi «сувязяў» у органах улады. У рэшце рэшт, падбухторшчыкi выцыганiлi ў прадпрымальнiка 10 тысяч долараў, якiя абяцалi перадаць уплывовым людзям. Але пасля таго як «пасрэднiкаў» у момант перадачы хабару затрымалi супрацоўнiкi КДБ, высветлiлася, што яны не збiралiся нi з кiм дзялiцца, i ўвогуле iлжэаафiцэры «хабарнага фронту» ад самага пачатку мелi намер «кiнуць» бiзнэсмена. Суд Цэнтральнага раёна сталiцы прыгаварыў дваiх аферыстаў да 4 гадоў пазбаўлення волi кожнага з канфiскацыяй маёмасцi, iх хаўруснiк атрымаў 3 гады зняволення.

Яшчэ адзiн «хабарны» махляр таксама спрабаваў злоўжыць даверам сталiчнага прадпрымальнiка. Жыхар Мiнска абяцаў бiзнэсмену дамовiцца з чыноўнiкамi сталiчнай мэрыi, каб тыя далi дазвол на змяненне рэжыму працы бара. На вырашэнне праблемы «пасрэднiк» папрасiў 1500 долараў, якiя, паводле яго слоў, былi прызначаны менавiта на подкуп чыноўнiкаў Мiнгарвыканкама. Насамрэч, як высветлiлася пасля затрымання падбухторшчыка, ён не меў нi ахвоты, нi магчымасцяў дапамагчы бiзнэсмену, а «шалёныя» грошы планаваў патрацiць выключна на свае патрэбы. Суд Кастрычнiцкага раёна сталiцы прыгаварыў «хабарнага» махляра да 2 гадоў папраўчых работ з утрыманнем 25 працэнтаў заробку ў даход дзяржавы.