«ОТИКО» думае пра Вас

Источник материала:

1. Расказвае начальнiк аддзела продажаў i маркетынгу СП Сяргей Баброў:

— Створанае ў 1993 годзе сумеснае прадпрыемства з самага пачатку было задумана як вытворца сучаснага па дызайну i практычнага абутку. Пачыналi з мужчынскага i жаночага — спачатку ўсяго тры-чатыры хадавыя мадэлi, i толькi потым паступова нарошчвалi асартымент. Цяпер новыя фасоны з’яўляюцца штогод, такое правiла. Абутак выпускаем для ўсiх сезонаў. Скажам, мужчынскi — для лета, для вясны, восенi i для зiмы. На натуральным i нейкую частку на штучным футры, на калодках i падэшвах розных фасонаў. Жаночы — таксама для зiмы, для вясны, лета, з адкрытай цi закрытай пяткай. Зараз развiваем накiрунак маладзёжнага, падлеткавага абутку, у тым лiку з элементамi спартыўнага дызайну. Чацвёрты год займаемся вытворчасцю дзiцячага абутку, знайшлi свайго ўстойлiвага спажыўца, i выпуск дзiцячага асартыменту пастаянна нарошчваем.

Не забываем пра людзей старэйшага, у тым лiку пенсiйнага ўзросту. Мы ў асноўным i арыентуемся на людзей з сярэднiм узроўнем дастатку, яны заўсёды ў любым кутку Беларусi змогуць набыць сабе недарагую, якасную i зручную абноўку з маркай «ОТИКО». Гэтая катэгорыя спажыўцоў мае здаровы «кансерватызм» — калi iм падабаецца пэўная мадэль, яны ў пошуках той жа якасцi i таго ж камфорту гатовы купляць яе i другi, i трэцi раз. Чым, дарэчы, тлумачыцца даўгавечнасць некаторых нашых мадэляў — да дзесяцi гадоў. Мы ўжо i не супраць зняць яе з патоку, тым больш што ёсць чым замянiць, але людзям падабаецца, яны яе бяруць гэтак жа ахвотна, як i раней. Магчыма, прываблiвае тое, што ўся наша прадукцыя вырабляецца з натуральнай сыравiны — натуральныя скура як для верху, так i для падкладкi, натуральнае футра i ўсё астатняе. Я ўжо сказаў, што цана — прымальная, i мы стараемся трымаць яе, наколькi гэта магчыма, на адным узроўнi.

У нас ёсць свая спецыфiка: выпускаем строчачна-лiццявы абутак, з першага дня працуем выключна лiццявым метадам мацавання падэшвы (у адрозненне ад традыцыйнага клеявога метаду). У гэтым наша канкурэнтная перавага. Метад дазваляе ствараць надзейны, сапраўды камфортны i зручны абутак для паўсядзённага выкарыстання. А ў 2001 годзе асвоiлi двухслойную падэшву. I вось вынiк старанняў калектыву: няма супiнатара — таму абутак лёгкi i гнуткi. Форма калодак капiруе форму ступнi — таму зручны. На танкетцы — таму ўстойлiвы. А двайны слой лiтой падэшвы з прымяненнем тэрмаполiўрэтана дае павышаную зносаўстойлiвасць. І верх у яго нi за што не адстане ад падэшвы. Чалавек правёў у нашым абутку восем гадзiн на рабоце, плюс дзве гадзiны ў дарозе, i нага не стамiлася.

Праўда, метад патрабуе значных матэрыяльных затрат i працяглай падрыхтоўкi да ўкаранення кожнага новага фасону. Прыкладна шэсць месяцаў. А ўжо ў кожнага фасону — свой мадэльны рад (дзесяткi новых мадэляў адначасова): з розным малюнкам абутку, розным колерам скуры цi спiлку, той цi iншай аддзелкай, з устаўкамi i iншымi дызайнерскiмi знаходкамi, са шнуркамi цi на лiпучках i iнш. Нашым мадэльерам дапамагае тварыць спецыяльны iтальянскi камп’ютарызаваны комплекс для мадэлявання. Дарэчы, прадпрыемства аснашчана сучаснай тэхнiкай iмпартнай вытворчасцi (нямецкiх, iтальянскiх i iншых вядомых фiрмаў).

Менавiта лiццявое мацаванне падэшвы i верху дазваляе дабiвацца такой высокай надзейнасцi абутку, што ён паспяхова вытрымлiвае шматгадовую эксплуатацыю. Як i прадугледжана ДАСТам, мы даём свайму абутку гарантыю да трох месяцаў, але звычайна ён «ходзiць» не адзiн i не два гарантыйныя тэрмiны, а да 2—3 гадоў. Яго можна надзець i на «выхад», i на работу, i на стадыён, i ў лес — ён цудоўна глядзiцца на назе i не падвядзе гаспадара.

Праводзiм маркетынгавыя даследаваннi рынку, якiя дапамагаюць арыентавацца ў спажывецкiм попыце. І даволi ўпэўнена рэалiзуем сваю прадукцыю не толькi ў Беларусi, але i ў Расii, Прыбалтыцы. Прыкладна 40—45 працэнтаў прадаём «дома», дзе маем уласны фiрменны магазiн у сталiцы, на вулiцы Цiмiразева, 11, i фiрменныя секцыi на 17 гандлёвых прадпрыемствах — ва ўсiх абласцях. І працэнтаў 50 — у суседняй Расii, перш за ўсё ў Маскве. Пастаралiся мець сваiх прадстаўнiкоў па ўсёй Расii: Санкт-Пецярбург, Нiжнi Ноўгарад, Екацярынбург, Уладзiвасток, Новасiбiрск. А ўжо з Расii праз нашых дылераў яна трапляе таксама ў Казахстан i ва Украiну.

Каб айчынны вытворца абутку адчуваў сябе больш упэўнена i працаваў больш эфектыўна, нам патрэбна падтрымка з боку дзяржавы. Размова iдзе нават не пра нейкiя прэферэнцыi, а пра стварэнне роўных умоў для ўсiх таваравытворцаў, у тым лiку для iмпарцёраў абутку. Каб iмпарцёры працавалi абсалютна афiцыйна, па тых жа «правiлах гульнi», што i мы.

2. Гаворыць Ларыса ГАРБУЗАВА, галоўны мадэльер-канструктар прадпрыемства:

— Параўнальна нядаўна на кан’юнктурнай нарадзе абутковых прадпрыемстваў Беларусi з дапамогай прафесiйных манекеншчыкаў мы прадстаўлялi сваю калекцыю — абутак, якi зараз на патоку, i перспектыўныя мадэлi. Пачулi неблагую ацэнку ад калег, нават занялi першае месца i атрымалi спецыяльны прыз.

Асартыментны пералiк у нас вялiкi, уключае ў сябе некалькi соцень мадэляў, ёсць што прапанаваць гандлю i з чым прыехаць на ярмарку. Да кожнай такой ярмаркi распрацоўваем новую калекцыю, у якую ўключаецца, як правiла, больш за сто новых мадэляў. Галасуюць, што называецца, пакупнiкi, яны выбiраюць мадэлi, якiя мы потым i запускаем у масавую вытворчасць.

На любы абутак уплывае мода, на наш таксама. Мы кожны раз уважлiва адбiраем каляровую гаму матэрыялаў, якiя прымяняюцца для верху, фурнiтуру, прадумваем канструктыўныя рашэннi. Выкарыстоўваем скуры эластычныя, з натуральным пакрыццём, рознакаляровы спiлак, для аддзелкi — лакавыя скуры. На паказе, пра якi я ўспамiнала, нашым дэманстрантам — маладым людзям — вельмi спадабалася авангардная калекцыя, непрывычная для лiццявога абутку, выкананая ў стылi «бiзнэс-казуаль». Ён спалучае ў сабе рысы класiчнага i спартыўнага стылю. Дапушчальныя яркiя колеры, камбiнацыi, i калi правiльна падабраць па каляровай гаме гальштук цi кашулю, то такi абутак можна насiць разам з дзелавым касцюмам. Так, дарэчы, моладзь i робiць. І яе можна зразумець, бо ўвесь час нельга трымаць мужчыну «зацiснутым» у строгiх рамках дзелавога касцюма цёмных таноў.

Ларыса Мiкалаеўна запрашае карэспандэнта «Звязды» падысцi да стэндаў з гатовай прадукцыяй у асартыментным пакоi.

— Вось тыповыя прадстаўнiкi накiрунку «бiзнэс-казуаль». Верх абутку выкананы са спiлку розных колераў, i прысутнiчае вельмi модная зараз аддзелка пад бронзу. Побач пара з чорнага спiлку, аддзелка верху — цiсненне пад рэптылiю. А гэта спiлак з нанесеным на яго пярэсценькiм малюнкам пад зебру. І спiлак пад вельвет, абутак з яго карыстаецца вялiкiм попытам сёлета. Стаiць абутак пад джынсы — сваiм колерам тканiна «дэнiм» iмiтуе джынсавую; i для свята — яркi, вясёлы. А вось тут пара больш строгага стылю: верх з чыстай гладкай скуры, як зараз модна. Побач чаравiкi, як мы жартуем, для «лянiвых» мужчын — замест шнуркоў лiпучка, цi правiльна сказаць — «велькро».

У дзiцячай калекцыi звярнiце ўвагу на гэтыя ўцепленыя чаравiчкi. Іх зручна насiць пры пераходзе ад халодных зiмовых дзён да больш цёплых веснавых. Так што хутка спатрэбяцца. Падкладка з натуральнай тканiны не дасць дзiцячай ножцы замерзнуць ранiцай, па дарозе ў школу. А вось мадэль, якая спадабаецца дзяўчынкам: белая скура i аранжавы спiлак... Наогул, выбар вялiкi.

3. Слова — галоўнаму тэхнолагу Аляксандры ШРУБОК:

— Работа над якасцю гатовай прадукцыi пачынаецца... з выбару пастаўшчыкоў сыравiны i камплектуючых для яе вырабу. У нас — надзейныя пастаўшчыкi, з якiмi мы працуем не адзiн год. Забяспечыць належную якасць дазваляе тое, што скураны тавар працэнтаў на 70 iдзе з Бразiлii. Калодкi для абутку пастаўляе знакамiтая фiрма Fаgus, заднiкi — з Iталii i Славенii i гэтак далей.

Тым не менш наладжаны жорсткi, не пабаюся гэтага слова, уваходны кантроль за якасцю матэрыялаў. Сартавальнiкi, калi рыхтуюць зменнае заданне, адбiраюць скуры па групах у адпаведнасцi з патрабаваннямi ДАСТа. Ланцужок кантролю працягваецца ў закройным цэху. Усе гатовыя дэталi пасля раскрою правяраюцца кантралёрамi АТК, i толькi потым перадаюцца ў швейную вытворчасць. Пачынаецца зборка, у ходзе якой ажыццяўляецца абавязковы мiжаперацыйны кантроль. Існуе цвёрдае правiла для рабочага: перад выкананнем сваёй аперацыi правер якасць. Сустракаюцца выпадкi, калi менавiта самi рабочыя вяртаюць адзiн аднаму нарыхтоўку цi паўфабрыкат на дапрацоўку. Так што самы надзейны кантроль — рабочы, i гэта асаблiва эфектыўна пры масавай вытворчасцi. Плюс пастаянны штодзённы кантроль з боку майстроў, у тым лiку i на этапе лiцця абутку. Гатовая пара цалкам правяраецца кантралёрамi АТК з пацвярджэннем пячаткай.

Высокай якасцi спрыяе тэхнiчнае пераўзбраенне. Вы былi ў нашых цэхах i на свае вочы бачылi новае высокапрадукцыйнае абсталяванне, тыя ж робататэхнiчныя комплексы для лiцця. Іх у нас некалькi, апошнюю мадыфiкацыю абслугоўвае толькi адзiн аператар-праграмiст. I новая машына для фармавання канта, i машына для фармавання насочнай часткi нарыхтоўкi, машыны для фармавання пятачнай часткi...

Уся наша прадукцыя сертыфiкаваная i цалкам адпавядае сусветным стандартам. Тым не менш ушчыльную прыступiлi да распрацоўкi ўласнай сiстэмы менеджменту якасцi на базе мiжнароднага стандарту ISО 9001. Прынялi на работу высокаквалiфiкаванага спецыялiста- абутнiка, зараз праходзiць мэтавую падрыхтоўку ў сiстэме Дзяржстандарту.

Я працую на «ОТИКО» з самага пачатку i лiчу, што ўдалося сфармiраваць згуртаваны калектыў — а гэта больш за 600 чалавек, якi разумее сваю задачу. Мы вельмi клапоцiмся аб прафесiйнай падрыхтоўцы кадраў. Распрацавана i ажыццяўляецца мэтавая праграма «Кадры», у яе рамках цесна працуем з каледжам лёгкай прамысловасцi, каледжам тэхналогii i дызайна лёгкай прамысловасцi ў Мiнску i ўнiверсiтэтам лёгкай прамысловасцi ў Вiцебску. У нас пастаянна праходзяць стажыроўку i практыку групы студэнтаў i навучэнцаў. Прыглядаемся да iх, а яны да нас, i найбольш здольныя i ўмелыя застаюцца на прадпрыемстве.

У нас нармальныя ўмовы для працы, мы атрымлiваем асалоду ад сваёй работы. Спадзяёмся, што такую ж асалоду атрымлiваюць i спажыўцы — ад нашага абутку з маркай «ОТИКО».

Публiкацыю падрыхтавалi

Уладзiмiр ХІЛЬКЕВІЧ,

Веранiка АРЛОЎСКАЯ.