Дзiцячыя дапамогi будуць павялiчаны

Источник материала:

У прыватнасцi, законапраект павялiчвае памеры аднаразовай дапамогi пры нараджэннi першага дзiцяцi да пяцi бюджэтаў пражытковага мiнiмуму, а пры нараджэннi другога i наступных дзяцей — да сямi бюджэтаў пражытковага мiнiмуму. У грашовым выражэннi дапамогi павысяцца да 852 тысяч i 1 млн 193 тысяч рублёў адпаведна. Што ж датычыцца дапамогi па догляду дзiцяцi ва ўзросце да 3 гадоў, то яна павiнна павялiчыцца да 80 працэнтаў бюджэту пражытковага мiнiмуму.

Акрамя гэтага, праект замацоўвае права на атрыманне дапамогi па догляду дзiцяцi ва ўзросце да трох гадоў у поўным памеры асобам, якiя ажыццяўляюць догляд такога дзiцяцi i якiя працуюць ва ўмовах няпоўнага працоўнага дня (не больш за палову месячнай нормы), а таксама жанчынам, якiя працягваюць навучанне на дзённай форме ва ўстановах, што забяспечваюць атрыманне прафесiйна-тэхнiчнай, сярэдняй спецыяльнай i вышэйшай адукацыi.

Яшчэ адна норма законапраекта дазваляе няпоўнай сям’i, у якой мацi цi бацьку ўстаноўлена I або II група iнвалiднасцi, прызначаць дапамогi на дзяцей ва ўзросце больш за тры гады ў поўным памеры незалежна ад сукупнага дахода на члена сям’i пры ўмове, што яна (ён) не працуе.

Законапраект таксама змяняе падыходы ў вызначэннi права на дапамогу па догляду хворага дзiцяцi пры яго стацыянарным лячэннi. Пры такiм лячэннi дзiцяцi ва ўзросце да пяцi гадоў прадугледжана магчымасць мацi, бацьку або iншай асобе знаходзiцца з iм у арганiзацыi аховы здароўя з выплатай дапамогi па догляду хворага дзiцяцi за ўвесь перыяд стацыянарнага лячэння. У дзеючым жа заканадаўстве такое права прадастаўляецца толькi на падставе заключэння ўрачоў аб неабходнасцi дадатковага догляду.

У першым чытаннi законапраект будзе разгледжаны на веснавой сесii. Старшыня профiльнай парламенцкай камiсii Алег Вялiчка не выключае, што пры належнай працы дакумент можна прыняць на гэтай жа сесii i ў другiм чытаннi. Аднак, адзначыла намеснiк начальнiка галоўнага ўпраўлення палiтыкi занятасцi народанасельнiцтва Мiнiстэрства працы i сацыяльнай абароны Таццяна Шаметавец, законапраект хутчэй за ўсё ўступiць у сiлу з пачатку наступнага года. Справа ў тым, што рэалiзацыя праекта патрабуе iстотных фiнансавых затрат, якiя не прадугледжаны бюджэтам на гэты год.

Падчас пасяджэння парламенцкай камiсii таксама было адзначана, што з 2009 года дапамога па догляду дзiцяцi ва ўзросце да трох гадоў павiнна дасягнуць памеру пражытковага мiнiмуму.