Хто ў доме гаспадар?..

Источник материала:

Экспертамi i «дзейнымi асобамi» былi шэсць шчаслiвых сямейных пар.

Паколькi абмен думкамi i дыскусii працягвалiся каля дзвюх гадзiн, мы выкладзем, так бы мовiць, квiнтэсенцыю, своеасаблiвы «рэцэпт шчасця» сучаснай сям’i.

1. Сям’я Кузняцовых

Тамара Усеваладаўна — член Грамадскага аб’яднання «Беларуская асацыяцыя шматдзетных бацькоў», мацi чацвярых дзяцей.

Iван Рыгоравiч — слесар-сантэхнiк РУП «Белмедпрэпараты», бацька чацвярых дзяцей.

Для яе жаночае шчасце — гэта здароўе дзяцей, разуменне ў сям’i. Дзецi — сэнс жыцця. А жаночая хiтрасць — гэта ўменне выйсцi з любой сiтуацыi.

— У нас чацвёра сыноў, i бацька для iх — узор. У нашай сям’i няма падзелу на жаночую i мужчынскую работу... 12 гадоў назад мы ўсынавiлi хлопчыка. Усяго адзiн кiлаграм ён важыў, калi я забiрала яго з раддома. Выхадзiлi, але аказалася, што ён вельмi хворы, ДЦП. Работу давялося пакiнуць... Усе сiлы ўкладваем у сына... Але я шчаслiвая жанчына: для мяне 8 Сакавiка не раз на год, а кожны дзень, — прызнаецца Тамара.

— 25 гадоў нашай сям’i. Мая жонка — моцны чалавек, — дадае Iван.

2. Сям’я Лiсiцкай—Ялфiмава

Тамара Рыгораўна Лiсiцкая — тэлевядучая праграмы «Вось такiя пiрагi», ды-джэй «Альфа-радыё», пiсьменнiца.

Вiталь Юр’евiч Ялфiмаў — ды-джэй радыё «Радыус-FM» (творчы псеўданiм — Глеб Марозаў).

Для яе жаночае шчасце — гэта сям’я, муж, любiмая справа i адэкватная ацэнка гэтай справы, а таксама здароўе. Жаночая хiтрасць — гэта мужчынская хiтрасць, толькi ў жанчыны. Любiмыя кветкi — тыя, якiя не адразу асыпаюцца.

— Нашай сям’i тры гады. Ёсць пытаннi, за якiя я нiколi не вазьмуся, — прызнаецца Вiталь. — Навошта перашкаджаць: адзiн чалавек павiнен i варыць, i салiць... Калi я не валодаю пытаннем, з задавальненнем яго абмяркую. Увогуле ўсё канкрэтна: мужчына сказаў — мужчына зрабiў.

— Па статыстыцы замужнiя жанчыны жывуць менш, чым незамужнiя. А жанатыя мужчыны — даўжэй, чым халасцякi, — гаворыць Тамара. — Сумяшчаць сямейнае жыццё з работай вельмi цяжка, нiчога не паспяваеш, стамляешся... Але мой муж — для мяне яшчэ i муза!

— Мая жонка — неверагодна прыгожая! I наколькi яна прыгожая, настолькi i разумная! Мне падабаецца ўсё, што яна робiць. Тамара — добры псiхолаг. Можна бясконца назiраць, як гарыць агонь, як цячэ вада i як гаворыць мая жонка, — дадае Вiталь.

3. Сям’я Лобач—Багданава

Марына Вiкенцьеўна Лобач — заслужаны майстар спорту, алiмпiйская чэмпiёнка па мастацкай гiмнастыцы ў Сеуле-1988.

Дзмiтрый Анатольевiч Багданаў — менеджар па продажах кампанii «Асбiс».

Муж прыхварэў, i таму на «круглым стале» Марыне давялося даваць справаздачу за дваiх.

— Галоўнае ў сямейным жыццi — цярпенне. Не бывае дрэнных мужа цi жонкi. Збудаваць сям’ю — гэта значыць штодзень па крупiнках «збiраць» яе, — перакананая Марына. — У гэтым годзе 15 гадоў нашай сям’i. У нас дзве дачушкi, Iрына i Надзея. Малодшай 6 гадкоў, старэйшай — 11. У нашай сям’i нельга вызначыць «галоўнага» — абсалютнае ўзаемаразуменне. Муж i жонка дапаўняюць адно аднаго. Калi некаму аддаць «кiраўнiчыя лейцы», дык другi будзе адчуваць сябе абдзеленым. Прынамсi, жанчыны заўсёды змагаюцца за свае правы, а мужчыны лiчаць, што менавiта яны — галоўныя (усмiхаецца). Жанчыне трэба зрабiць усё магчымае, каб муж лiчыў сябе галоўным i той жа час каб ён усяляк падтрымлiваў жонку.

4. Сям’я Матульскiх

Тамара Уладзiмiраўна — лагапед Рэспублiканскага навукова-практычнага цэнтра «Мацi i дзiця».

Раман Сцяпанавiч — дырэктар Нацыянальнай бiблiятэкi Рэспублiкi Беларусь.

Яна перакананая: «галава» сям’i той, хто прымае рашэннi i нясе за iх адказнасць. А жаночае шчасце — «быў бы мiлы побач». Жаночая хiтрасць — ласкавае кiраўнiцтва для дасягнення сваiх жаданняў (ацэнiм гэту мудрасць, жанчыны!). Галоўнае сямейнае свята — дзень вяселля...

Iх сыну Тарасу — 24, дачцэ Аксане — 20. А мацi, Тамара, такая абаяльная i прывабная, — цяжка паверыць, што такiя дарослыя дзецi!

— Усе праблемы вырашаем разам, — адзначае Тамара.

— Сям’я — той асяродак, дзе цябе заўсёды зразумеюць i падтрымаюць — нават калi праўда не на тваiм баку, — Раман Матульскi быў гранiчна шчыры. — Нядаўна жанiўся наш сын. А ёсць такая даўняя хрысцiянская традыцыя: праводзiць маладых у царкву павiнна шчаслiвая сямейная пара, бо сям’я павiнна нараджацца ў шчаслiвай ауры. Мы не знайшлi... Не, сярод нашых знаёмых шмат шчаслiвых сем’яў — але не ў першым шлюбе... Галоўнае ў сям’i — гэта адказнасць адзiн за аднаго. На жаль, некаторыя сучасныя маладыя сем’i нагадваюць магазiны «сэканд-хэнд»: узяў — панасiў — зноў здаў у магазiн...

5. Сям’я Чуйко

Вера Аляксееўна — бiблiятэкар СШ № 212 г. Мiнска.

Рыгор Пятровiч — генеральны дырэктар УП «Агракамбiнат «Ждановiчы».

Жаночае шчасце для яе — бачыць сваё адлюстраванне ў вачах каханага. Жаночая хiтрасць — ва ўменнi прамаўчаць. А прафесiя жонкi — гэта хобi (адзначым: апошняе i здзiвiла, i ўразiла яе супруга).

— Якая несправядлiвасць: пераважная большасць твораў мастацтва прысвечана нешчаслiвым сем’ям! — недаўмявае Рыгор Чуйко. — Не разумею, чаму пра шчаслiвыя сем’i гаварыць не тое што не прынята, але лiчыцца... нецiкавым. Мы 26 гадоў разам, жонка — раўнапраўны партнёр у сям’i. Я — гаспадар, яна — гаспадыня. Кожны заняты сваёй справай, у нас няма часу на нейкiя сямейныя «разборкi»... Увогуле чалавеку нельга рабiць дзвюх галоўных памылак у жыццi: пры выбары прафесii i пры выбары спадарожнiка жыцця.

— Жонка павiнна стварыць такую абстаноўку, каб мужу хацелася iсцi дадому, — адкрывае свой сакрэт шчасця Вера. — I перш за ўсё трэба палюбiць хобi мужа. «Хварэць» за яго на тэнiсным корце, разам хадзiць на футбол, у басейн, у лазню...

6. Сям’я Швец

Юлiя Алегаўна — хатняя гаспадыня.

Аляксандр Iосiфавiч — кiраўнiк прадстаўнiцтва кампанii «ХЕRОХ».

Яе жаночая хiтрасць — нiчога не патрабуючы, атрымлiваць усё. А прафесiя жонкi — штодзённая, штомiнутная праца па ўласным жаданнi...

— У нас двое дзяцей, Настассi 7 гадоў, Алегу — 3. Быць гаспадыняй дома — гэта вельмi вялiкая праца... Магчыма, менавiта я ў доме гаспадар — калi так думае жонка, — гаворыць Аляксандр.

— Я замужам — сапраўды за мужам. Выхоўваю дзяцей, кар’ерныя амбiцыi для мяне пакуль не актуальныя. Але добрыя, выхаваныя дзецi — хiба не галоўная «кар’ера» для жанчыны? — мяркуе Юлiя.