Кошт элiтнага жылля ў сталiцы дасягае 3,5 тыс. USD за кв. м

Источник материала:

Прэстыжным, або элiтным жыллём у Мiнску лiчацца нават невялiкiя аднапакаёвыя кватэры ў пяцi- або дзевяцiпавярховых дамах у цэнтры горада, або ўздоўж праспектаў каля знакавых гандлёвых цэнтраў. Кватэры прадаюцца абавязкова пасля еўрарамонту, з сучаснымi плiткай, кафелем, ламiнатам i наяўнасцю падземных гаражоў. Такiя кватэры агульнай плошчай 30—35 квадратных метраў каштуюць сёння 70—80 тысяч долараў.

Кошт двухпакаёвага элiтнага жылля залежыць ужо не толькi ад плошчы кватэр i месцазнаходжання дамоў, але i ад дызайн-праектаў, мэблi i сучаснага бытавога абсталявання. Такiя «двойкi» плошчай ад 50 да 80 квадратных метраў каштуюць ужо ад 85 да 185 тысяч долараў.

Вялiкiя па плошчы шматпакаёвыя кватэры, часам на двух узроўнях прапануюцца часцей у адносна новых дамах, дзе квадратны метр жылля каштуе ад 2 да 2,5 тысячы долараў. Iснуюць у Мiнску i кватэры сапраўды экстра-класа. Такое жыллё будуецца цi рамантуецца пад еўра-стандарт, дзе абавязкова прысутнiчае падлога з падагрэвам, з убудаванымi кухнямi па спецпастаўках з краiн Заходняй Еўропы i з усiмi неабходнымi бытавымi прыборамi для камфортнага жылля. Кошт квадратнага метра такога жылля дасягае 3,5 тысячы долараў. Асобныя кватэры элiтнага жылля прапануюцца зараз за 250—350 тысяч долараў. Iснуе i больш дарагое жыллё, але рэальны кошт такiх кватэр вызначаецца толькi выключна па дамоўленасцi з канкрэтным патэнцыяльным пакупнiком.

Самыя танныя катэджы ў сталiцы без аддзелкi каштуюць каля 300 тысяч долараў. Атрымлiваецца, што квадратны метр такога жылля каштуе 1,2—1,5 тысячы долараў. Катэджы ў Мiнску, цалкам гатовыя для жылля, але без мэблi каштуюць ужо 500—600 тысяч долараў, калi квадратны метр агульнай плошчы дасягае 2 тысяч долараў. Вядома, што на такое жыллё плошчай 150—300 квадратных метраў iснуе выключна свой iндывiдуальны пакупнiк. Катэджы такога плана прадаюцца агенцтвамi нерухомасцi гадамi.