«Шэф-цырульнiкi» ў Беларусi

Источник материала:

Новую модную калекцыю «Барока», у якой адлюстроўваюцца падыходы да сучасных прычосак, прыехалi паглядзець не толькi мiнскiя стылiсты, але i цырульнiкi з Вiцебска, Магiлёва, Брэста. Новая калекцыя — гэта дэманстрацыя жаночага гарманiчнага вобраза. «Сюды мы прыйшлi не толькi палюбавацца шоў, — дзеляцца са мною цырульнiцы, — але ўзяць нешта цiкавае i для сябе, бо з такiмi прычоскамi заўсёды можна выйсцi на вулiцу» . I сапраўды, калекцыя ўражвае сваёй «прастатой» i густам.

— Прафесiйныя майстар-класы такога ўзроўню ў нашай краiне яшчэ не праходзiлi, — расказвае супрацоўнiк кампанii «Revlon profession» у Беларусi Iрына Бараусава. — Вельмi прыемна, што новую калекцыю, якая была паказана яшчэ толькi ў дзвюх краiнах, Раунэль Наваес адразу прывёз ў Беларусь. Ён вельмi задаволены ўзроўнем падрыхтаванасцi нашых стылiстаў. Толькi нам яшчэ ёсць куды iмкнуцца!

Сам Наваес, якi, дарэчы, таксама i стылiст мiжнароднай школы стылю ў Германii, Швейцарыi, Францыi, Iспанii, дадае:

— Я прыехаў падымаць узровень беларускiх цырульнiкаў. Раней жа былi повары, а зараз — шэф-повары. Дык вось я хачу, каб тут былi не проста цырульнiкi, а шэф-цырульнiкi!

Гэтым летам Раунэль Наваес зноў плануе наведаць Беларусь з новай калекцыяй, якая, паводле яго слоў, уразiць абсалютна ўсiх.