Здароўе выбаршчыкаў — клопат дэпутатаў

Источник материала:

Начальнiк упраўлення аховы здароўя аблвыканкама Валянцiн Мiлашэўскi расказаў аб сiстэме арганiзацыi медыцынскай дапамогi на некалькiх тэхналагiчных узроўнях: раённым, мiжраённым (Баранавiчы, Пiнск) i абласным. На мiжраённым узроўнi медыцынскую дапамогу аказваюць па тых асобных спецыялiзацыях, якiх няма, скажам, у Столiне цi Ляхавiчах. А абласны ўзровень — спецыялiзаваная, высокаквалiфiкаваная дапамога, якая ў выпадку патрэбы будзе аказана жыхару любога куточка Брэстчыны. Узяць, напрыклад, гемадыялiз (штучную нырку). Яе кошт — каля 50 тысяч еўра. А з падрыхтоўкай да працэдуры сума выглядае яшчэ большай. Таму ў кожным раёне мець гемадыялiз немагчыма, а вось на мiжраённым узроўнi такая дапамога аказваецца на самым сучасным узроўнi.

Асаблiвая ўвага падчас разгляду пытання ўдзялялася развiццю медыцыны ў вёсцы. Зараз у вобласцi дзейнiчае 403 ФАПы. За апошнiя гады адкрыта яшчэ 18 урачэбных амбулаторый з дзённым стацыянарам на некалькi ложкаў, дзе вяскоўцам можна падлячыцца ў дзве змены. На ФАПах па графiку хворых прымаюць урачы райбальнiц.

Актуальнымi застаюцца праблемы хуткай медыцынскай дапамогi. Сёння 85 працэнтаў станцый i аддзяленняў хуткай дапамогi аснашчана УАЗамi, што не задавальняе нi медыкаў, нi пацыентаў. Але сучасны рэанiмабiль каштуе 160 тысяч еўра. I пакуль што замянiць тэхнiку няма магчымасцi.

На сесii падрабязна прааналiзаваны паказчыкi, якiя сведчаць пра стан аховы здароўя ў рэгiёне. Дэпутаты канстатавалi станоўчую дынамiку паказчыка нараджальнасцi. Яе ўзровень склаў 10,8 чалавека на 1000 насельнiцтва, у 2005 годзе — 10,3. Па асноўнаму пытанню прынята адпаведная пастанова. Сесiя таксама зацвердзiла праграму забеспячэння санiтарна-эпiдэмiялагiчнага дабрабыту насельнiцтва вобласцi на 2007—2010 гады, праграму дэмаграфiчнай бяспекi на такi ж перыяд.