Спякота правакуе масавыя трагедыi на вадзе

Источник материала:

Увага

Як паведамiў карэспандэнту «Звязды» вядучы спецыялiст Рэспублiканскага таварыства ратавання на водах Вiктар Харошка, толькi за мiнулы тыдзень зарэгiстравана 70 выпадкаў утапленняў, у тым лiку 14 дзяцей. Сапраўды чорнымi днямi сталi для краiны мiнулыя выхадныя, калi патанула ажно 36 чалавек. Самая маштабная бяда наведала найбольш спякотны рэгiён краiны — Гомельскую вобласць, дзе ў мiнулы тыдзень у вадзе загiнула 22 чалавекi. У Мiнскай вобласцi за гэты час патанула 4 чалавекi.

Трэба адзначыць, што ў вызначаны перыяд у ахоўнай зоне выратавальных станцый i пастоў АСВОД было выратавана 48 чалавек i трагiчных выпадкаў удалося пазбегнуць увогуле.

Большая частка загiнулых (54 працэнты) сталi ахвярамi вады пры купаннi, астатнiя гiнулi ў вадзе бытавых ёмiстасцяў цi пры iншых абставiнах. У прыватнасцi, на выхадныя група з 8 чалавек актыўна спажывала алкагольныя напоi на беразе Чыжоўскага вадасховiшча. У 2 гадзiны ночы, пасля чарговай чаркi адзiн з iх пайшоў асвяжыцца i патануў... Спецыялiсты АСВОД адзначаюць, што каля 60 працэнтаў загiнулых наведвалi вадасховiшчы пасля выпiтага алкаголю. Беражыце сябе i сваiх дзяцей!

Сяргей КУРКАЧ.

***

У мiнулы аўторак, у другой палове дня ў Быхаве з маста сiгануў мужчына. Цяпер вадалазы шукаюць яго цела. Верагодна, што ён проста хацеў скокнуць у ваду з вышынi, але такi ўчынак аказаўся цалкам падобным на самагубства.

Каторыя суткi не ўдаецца знайсцi 29-гадовага мужчыну, якi 27 мая з сябрамi палез купацца ў возера паблiзу вёскi Забалацце Магiлёўскага раёна. Уся кампанiя была нецвярозая: пайшлi ў ваду чацвёра — выйшлi толькi трое. Кажуць, адзiн вырашыў паплаваць больш, iншыя адгаворвалi, а ён не паслухаўся...

Паводле слоў начальнiка вадалазна-выратавальнай службы Магiлёўскага абласнога АСВОД Мiкалая Луганцова, у Магiлёве на беразе ракi знайшлi адзенне. Нiбыта ёсць сведкi, што тут плаваў мужчына, але дзе ён цяпер — невядома, вядуцца пошукi.

Раней у Магiлёўскiм раёне знiк рыбак — 40-гадовы мужчына. На месцы лоўлi рыбы засталiся яго рукзак i тры вуды. Цела рыбака шукалi доўга i знайшлi за 20 кiламетраў ад яго рэчаў. Што з iм здарылася — невядома, але чалавек патануў.

У Магiлёве за май патанула больш за дзесяць чалавек. Сярод iх — трое непаўналетнiх. «Звязда» пiсала пра трагiчны выпадак, калi на рацэ Днепр патанулi два 9-класнiкi. Яшчэ адна трагэдыя здарылася ў Горках: у сажалцы патануў 17-гадовы студэнт медвучылiшча. Астатнiя тапельцы — людзi розных узростаў, якiя купалiся ў рэках i вадаёмах Чавускага, Круглянскага, Асiповiцкага, Магiлёўскага i Касцюковiцкага раёнаў.

Выратавальнiкi на вадзе яшчэ раз нагадваюць аб небяспеках першай вады: яе тэмпература на паверхнi i ў глыбiнi рознiцца iстотна, ад чаго могуць узнiкнуць сутаргi i перабоi ў рабоце сэрца нават у здаровых людзей. Тым больш, калi чалавек смажыцца на сонцы ў самыя спякотныя гадзiны альбо прымае моцныя напоi. Нярэдка заканчваюцца трагедыямi i спрэчкi маладых людзей на здольнасць пераплыць альбо нырнуць. АСВОД заклiкае людзей не рабiць глупстваў i забывацца на ўласную бяспеку на вадзе.

Iлона IВАНОВА.