Полацк пойдзе ў оперу

Источник материала:

1 чэрвеня прывiды оперы паспрабуюць павярнуць палачан да сваёй веры. Канцэрт пачнецца а дзесятай гадзiне вечара. Нават славуты полацкi арган растрывожаць у познi час рукi полацкай арганiсткi Ксенii Пагарэлай, каб дзiўныя гукi «Ave Maria» пераканалi гараджан у цудадзейнасцi ўсяго, што адбываецца. Цудам многiя, пэўна, могуць палiчыць i тое, што мастацтва, якое лiчыцца адным з самых складаных для ўспрыняцця, насамрэч адкрытае i дэмакратычнае. Нават папулярнае. Многiя пазнаюць вядомыя i знаёмыя мелодыi, якiя прыемна напяваць сабе не горш за самы модны шлягер. I вось жывуць жа, трымаюцца ў «рэйтынгу» цэлыя стагоддзi!.. Прычым оперныя партыi яшчэ i спяваюць без анiякiх фанаграм, жывымi, непадробнымi галасамi. Артысты Беларускай оперы ўжо ведаюць, чаго вартыя такiя канцэрты — ля муроў Мiрскага замка спявалi, у Германii ды Швейцарыi на летнiх фестывалях на адкрытым паветры таксама выступалi. Пад адкрытым небам у Полацку будуць гучаць лепшыя галасы беларускай опернай сцэны — салiстаў Уладзiмiра Пятрова, Нiны Шарубiнай, Сяргея Франкоўскага, Аксаны Волкавай, Алега Мельнiкава, Аляксандра Кеды, Настассi Масквiной, Таццяны Гаўрылавай, Эдуарда Марытнюка, Алены Шведавай, Аксаны Якушэвiч. Артысты запрашаюць разам прычакаць апоўначы — а там будзе не проста прыгожы фiнал, а вялiкi феерверк. Спецыяльна для тых, хто сцвярджае, што нiякiя прывiды оперы не запалохаюць, калi чакаеш сустрэчы з гэтым чароўным мастацтвам.