Лiчба 13 — шчаслiвая для беларускiх гандбалiстаў

Источник материала:

Ведай нашых!

— Вiншую вас i нашу зборную з выхадам на чэмпiянат Еўропы! Спартак Пятровiч, мiнулыя спробы прабiцца ў фiнальныя часткi топ-турнiраў беларусам не ўдалiся. Чым растлумачыце сёлетнi поспех?

— Зараз нашы гандбалiсты жадаюць выступаць за сваю зборную i робяць усё магчымае для каманды, бо адчуваюць, што яны патрэбныя ёй. Штуршком да гэтага стала змяненне сiтуацыi ў беларускiм гандболе ў станоўчы бок. Фундамент для гэтага заклаў Указ Прэзiдэнта. Вялiкую ўвагу развiццю нашага вiду спорту ўдзяляе старшыня федэрацыi гандбола Уладзiмiр Мiкалаевiч Канаплёў (менавiта пасля гутаркi з iм у зборную вярнуўся адзiн з лепшых беларускiх гандбалiстаў Сяргей Гарбок, якi ўжо збiраўся выступаць за расiйскую каманду).

— У матчы са зборнай Швейцарыi ў Брэсце вашы падначаленыя зрабiлi вялiкi задзел перад гульнёй у гасцях у 9 мячоў. Як вы стрымлiвалi iгракоў, каб яны не перагарэлi з-за такой сваёй перавагi, бо адыграць 9 мячоў вельмi цяжка?

— Не пагаджуся. 3 цi 4 гады таму наша каманда прайграла ў Аўстрыi 9 мячоў, а дома давяла рознiцу да 11-i. Былi i iншыя выпадкi гiсторыi гандбола. Перад матчам у Швейцарыi я сказаў сваiм iгракам, што калi яны расслабяцца, стануць самаўпэўненымi, то гаспадары не ўпусцяць свой шанц, таму эйфарыi ў зборнай не было.

— У якi момант гульнi вы дазволiлi сабе падумаць аб пуцёўцы ў Нарвегiю, на чэмпiянат Еўропы ў студзенi наступнага года?

— Пэўна, за пяць хвiлiн да заканчэння матча ў Швейцарыi. Аднак упэўненасць у поспеху, зразумела, прыйшла толькi пасля гульнi.

— У пятнiцу адбудзецца жараб’ёўка 16 удзельнiкаў Еўра-2008. У папярэднiм раўндзе наша зборная не сустрэнецца са сваiмi суседзямi на карзiне — камандамi Чэхii, Швецыi, Чарнагорыi. Якiя варыянты з астатнiх сапернiкаў вас задаволiлi б?

— Вы ведаеце, мы жадаем згуляць з усiмi i ...нi з кiм, бо слабых каманд там няма, таму не мае значэння, хто з сапернiкаў нам дастанецца.

— Як каманда святкавала свой поспех?

— Мы не хавалi сваёй радасцi — спявалi на возеры. Спевакоў у нашай зборнай хапае.

— Калi пачнецца падрыхтоўка?

— Пакуль iгракi адпачываюць. Мы ж толькi ў панядзелак ноччу прыехалi. Зараз трэба скласці план падрыхтоўкi. Нам яшчэ не абвяшчалi задачы на чэмпiянаце Еўропы, хоць, зразумела, што каманда хоча паказаць добры вынiк.

Сяргей ГАРБОК: «Еўропа ад майго вяртання ў шоку»

З радасцю ад выхаду нашай зборнай у фiнальную стадыю кантынентальнага першынства магчыма параўнаць эмоцыi балельшчыкаў ад вяртання ў каманду аднаго з самых моцных беларускiх iгракоў Сяргея ГАРБОКА, былога гандбалiста славенскага «Цэле», а зараз паўсярэдняга нямецкага «Кронаў», якi трэнiруе беларускi спецыялiст Юрый Шаўцоў. Швейцарцы ўжо «спiсалi» Сяргея са сваiх сапернiкаў, бо ў мiнулым годзе ён вырашыў змянiць беларускае грамадзянства на расiйскае, каб выступаць за нашых усходнiх суседзяў. Аднак пасля размовы са старшынёй беларускай федэрацыi гандбола, старшынёй Палаты прадстаўнiкоў Уладзiмiрам Канаплёвым ён перадумаў i застаўся ў зборнай Беларусi. Разумееце, наколькi не чакалi швейцарцы, што iм давядзецца процiстаяць нацiску Сяргея ў плэй-оф, калi той сенсацыйна ўзмацнiў беларускую «нацыяналку»?

— Магчыма, маё з’яўленне ў складзе нацыянальнай каманды Беларусi стала сенсацыяй для ўсёй гандбольнай Еўропы, — кажа Сяргей. — Многiя ведалi, што я збiраюся выступаць за расiйскую зборную, у мяне былi прапановы гуляць i за iншыя зборныя. Я вельмi рады, што вярнуўся на радзiму. Мяне перапаўняюць эмоцыi.

— Цяжка было ўтрымаць перавагу ў Швейцарыi?

— Мы зрабiлi вялiкi крок да пуцёўкi на чэмпiянат Еўропы, калi выйгралi 9 мячоў у Брэсце. Дома была вялiкая падтрымка трыбун, быццам на матчах еўрапейскай Лiгi чэмпiёнаў. У гасцях жа нiякага нацiску з боку мясцовых балельшчыкаў я не адчуў. Мы не выйгралi, але гулялi, як i патрэбна было, — утрымалi сваю перавагу.

— Якiя варыянты жараб’ёўкi задаволiлi б нашу каманду?

— Асабiста я не хацеў бы трапiць на Францыю (чэмпiён) i Германiю: гэта вельмi моцныя сапернiкi, якiя паказваюць стабiльную гульню. З iншымi ж камандамi можна змагацца.

— Хацелася б памерацца сiламi з расiянамi?

— Магчыма. Аднак з расiянамi лепей сустрэцца на папярэднiм этапе, таму што ў канцоўцы яны прыбаўляюць.

— Знаходзячыся ў складзе каманды, безумоўна, адчуваеш, на што яна варта на «Еўропе»...

— Мы ставiм перад сабой максiмальныя мэты. Калi ўсё складзецца добра, можам заняць высокае месца.