Урокi гiсторыi ад «Каляды-тура»

Источник материала:

Пазнай Беларусь!

Прыярытэты фiрмы бачныя ўжо па афармленню iнтэр’ера офiса — тут i калаўрот, i узоры нацыянальнага ткацтва, i збаны, i рыцарская атрыбутыка...

— Вось гэтыя рэчы ткала мая бабуля, — расказвае Жанна Анатольеўна. — А iншае збiрала ў падарожжах па Беларусi, ва Украiне. Абавязкова нешта новае прывозiм з рыцарскiх турнiраў.

— А што гэта за манеты?

— I старадаўнiя, i сучасныя, з розных краiн. Пачатак калекцыi паклалi мы самi, каб зацiкавiць клiентаў нейкай «фiшкай», а цяпер i яны прыносяць.

Але галоўная «фiшка» турбюро — гэта, канешне, шырокi выбар экскурсiйных маршрутаў па нашай краiне. Тут i «Старажытныя замкi Беларусi» (Навагрудак—Мiр—Нясвiж—возера Свiцязь), i «Чароўная казка Палесся» (Ружаны—Косава—Марачоўшчына—Лагiшын—Дастоева—Пiнск), i «Святынi Беларусi» (Ваўкавыск—Сынкавiчы—Слонiм—Жыровiчы), i «Гасцiнцам Купалы» (Вязынка—Мiнск—Акопы—Харужанцы), i «Горад майстроў» (Мажэйкава—Бярозаўка—Лiда), i «Шляхам старажытных гудаў» (Гудзевiчы—Рось—Багатырэвiчы—Мiневiчы), i Аўгустоўскi канал (Гродна—Свяцк—Сапоцкiн—Сонiчы—Дамброўка—Нямнова)... Па кожнаму маршруту — таблiца з коштам праезду (фiрма мае аўтобусы «Неаплан», «Мерседэс», а неўзабаве будзе i яшчэ адзiн), экскурсiйнага абслугоўвання, уваходнага бiлета на той цi iншы экскурсiйны аб’ект.

Галоўныя партнёры «Каляды-тура» — гэта школы, ВНУ, прафсаюзныя камiтэты прадпрыемстваў i арганiзацый.

— Цяпер, летам, вельмi цiкавяцца адпачынкам у Крыме, — гаворыць Жанна Столяр. — Але кожны, хто прыходзiць да нас па пуцёўку, атрымлiвае i рэкламу падарожжаў па Беларусi. Перадайце, прашу, вашаму старшынi прафкама, мо зацiкавiцца. I попыт ёсць. А ў школы з прапановамi па экскурсiйных турах мы iдзём самi, з дапамогай перасоўнага стэнда. Шкада толькi, што экскурсii для навучальных устаноў дазволены толькi па суботах i нядзелях — у гэтыя днi аўтобусаў для ўсiх жадаючых не хапае, праблематычна з экскурсаводамi. Да таго ж, шмат цяганiны з афармленнем дакументаў на экскурсiю школьнiкаў, не пазайздросцiш настаўнiкам, якiя павiнны абысцi ўсе iнстанцыi.

— Якiя настроi пераважаюць сярод вашых клiентаў: жаданне адпачыць альбо пазнаць Беларусь?

— Яны, як правiла, стараюцца як мага больш убачыць. Хоць вельмi важна, асаблiва для дзяцей, i тое, што спадарожнiчае знаёмству з экскурсiйнымi аб’ектамi. Патлумачу сваю думку ўбачаным у Тунiсе. Сярод работнiкаў тутэйшага турсэрвiсу важная роля належыць анiматарам — людзям, якiя прафесiйна займаюцца арганiзацыяй адпачынку турыстаў. Ранiцай яны — са свiсткамi, запрашаюць на зарадку. Увечары — стаяць у фраках ля бараў. Заходзiш у клуб — анiматары ўжо на сцэне, праводзяць вiктарыны. Пайшлi пагуляць у тэнiс — яны цягнуць п’едэстал, на рукавах — медалi, аб’яўляюць, што група беларускiх турыстаў праводзiць турнiр, каментуюць яго... Анiматары — гэта работнiкi будучынi ў сферы турызму i адпачынку, i нам, лiчу, абавязкова трэба рыхтаваць такiх прафесiяналаў у навучальных установах. Бо адна справа — сфатаграфавацца з рыцарам, якi стаiць, як укапаны, у адным месцы. I зусiм iншы эфект — калi ў Нясвiжы вас сустрэне тэатралiзаваная група з тых жа рыцараў, прыдворных дамаў у гiстарычных касцюмах i паспрабуе зачараваць нейкiм дзействам.