Беларусь i Венесуэла выйшлі на ўзровень стратэгiчнага партнёрства

Источник материала:

Беларусь i Венесуэла выйшлi на ўзровень стратэгiчнага партнёрства, пра што сведчаць i рэгулярныя кантакты лiдараў дзвюх краiн. Аб гэтым заявiў кiраўнiк беларускай дзяржавы Аляксандр Лукашэнка ў час сустрэчы з прэзiдэнтам Балiварыянскай Рэспублiкi Венесуэла Уга Чавесам.

Аляксандр Лукашэнка падкрэслiў, што ўжо сёння ёсць канкрэтныя вынiкi па пытаннях здабычы нафты, пастаўцы ў Венесуэлу беларускiх калiйных угнаенняў, кар’ерных самазвалаў, грузавых аўтамабiляў, трактароў, ажыццяўляюцца праекты ў галiне сейсмаразведкi i сейсматэхнiкi, газiфiкацыi, прамысловасцi, архiтэктуры i будаўнiцтва, сельскай гаспадаркi i харчавання.

Паводле слоў Прэзiдэнта, гэтыя праекты «iдуць шырокiм фронтам, i мы гэтага дасягнулi ўсяго за год, пачынаючы практычна з нуля».

«Я ўспрымаю Вашы словы аб тым, што Вы шчаслiвы тут быць, як сапраўды ўлюбёнасць у нашу краiну i наш народ. Таму я вельмi ўдзячны за тое, што Вы прыехалi», — сказаў Аляксандр Лукашэнка. На гэта Уга Чавес адказаў, што ён з кожным прыездам «яшчэ больш улюбляецца ў Беларусь».

Прэзiдэнт Венесуэлы Уга Чавес высока ацэньвае эфектыўнасць сумесных з Беларуссю праектаў у сферы нафтаздабычы.

Паводле яго слоў, бакi ўжо разглядаюць мноства праектаў у розных сферах, у тым лiку ў нафтавай, нафтахiмiчнай галiне, а таксама ў сейсмалогii. «Нас вельмi ўражвае эфектыўнасць работы беларускай каманды», — сказаў прэзiдэнт Венесуэлы.

Ён адзначыў высокую рэзультатыўнасць вiзiту Дзяржсакратара Савета бяспекi Беларусi Вiктара Шэймана ў Венесуэлу ў сакавiку гэтага года. «Мы вельмi добра папрацавалi i значна рушылi наперад дзякуючы гэтаму вiзiту», — адзначыў венесуэльскi лiдар.

Для абмеркавання пытанняў двухбаковага супрацоўнiцтва Уга Чавес «прывёз у Беларусь усю сваю каманду». «Вельмi важная падтрымка, якую вы нам цяпер аказваеце», — дадаў прэзiдэнт Венесуэлы, звяртаючыся да Аляксандра Лукашэнкi.

Уга Чавес падкрэслiў таксама, што беларусы ўжо сталi для венесуэльцаў брацкiм народам. «Нават не трэба папярэджваць загадзя аб вiзiце, а проста сказаць, што я ўжо еду», — сказаў ён. Пры гэтым ён падкрэслiў, што як толькi Аляксандр Лукашэнка збярэцца наведаць Венесуэлу, яго заўсёды гатовы там прыняць.

Кар. БЕЛТА.