У аснову закона — патрабаваннi жыцця

Источник материала:

Паважаныя дэпутаты!

Паважаныя члены Урада, журналiсты i запрошаныя!

Завяршаецца работа шостай сесii Палаты прадстаўнiкоў Нацыянальнага сходу Рэспублiкi Беларусь трэцяга склiкання.

Разгледжана 124 пытаннi. Прынятыя 34 законапраекты ў першым чытаннi, 71 — у другiм, у тым лiку ратыфiкаваныя 23 мiжнародныя дагаворы. Да ведама прынята 7 часовых дэкрэтаў Прэзiдэнта Рэспублiкi Беларусь.

У цэлым сесiя атрымалася нерадавая. Не толькi таму, што ўзраслi iнтэнсiўнасць i аб’ём работы. Галоўнае — вырашаны шэраг прынцыпова важных для будучага краiны пытанняў. Прыняты законапраекты, накiраваныя на рэфармаванне пенсiйнай сiстэмы, удасканаленне механiзму падтрымкi сям’i, мацярынства i дзяцiнства, сферы працоўных адносiнаў.

У гэтым шэрагу трэба адзначыць Закон «Аб дзяржаўных сацыяльных iльготах, правах i гарантыях для асобных катэгорый грамадзян», абмеркаванне якога выклiкала вялiкi грамадскi рэзананс.

Яшчэ раз падкрэслю: яго прыняцце не азначае адыходу ад заяўленай дзяржавай моцнай сацыяльнай палiтыкi. Гэта неабходны крок у мэтах стварэння больш справядлiвай i эфектыўнай сiстэмы сацыяльнай падтрымкi, што павiнна забяспечыць рэальную абарону iнтарэсаў грамадзян, якiя маюць у ёй патрэбу.

У аснову гэтай работы пакладзены прынцып, сфармуляваны Прэзiдэнтам у Пасланнi беларускаму народу i Парламенту: дзяржава абавязана дапамагаць тым, хто сапраўды мае патрэбу ў падтрымцы. Астатнiм трэба стварыць аптымальныя ўмовы для самарэалiзацыi.

Менавiта ў гэтым ключы вялася работа над праектам законаў, прызначаных забяспечыць рытмiчнае развiццё народнагаспадарчага комплексу, стымуляваць эканамiчную актыўнасць насельнiцтва. Гэта законапраекты, накiраваныя на развiццё гандлю, аўтамабiльнага транспарту i аўтамабiльных перавозак, электрасувязi, спажывецкай кааперацыi, рэкламнай дзейнасцi.

Прыняты законапраекты аб унясеннi значных змяненняў i дапаўненняў у Гаспадарчы працэсуальны, Працоўны, Водны кодэксы.

Сярод праектаў законаў, што садзейнiчаюць актывiзацыi маладзёжнай палiтыкi, у якасцi найбольш важнага адзначу законапраект аб вышэйшай школе, дзякуючы якому прававое рэгуляванне нашай сiстэмы адукацыi набывае лагiчную завершанасць.

Значная ўвага ў ходзе сесii ўдзелена пытанням умацавання законнасцi i правапарадку. Найбольш важнымi тут з’яўляюцца новы Закон аб пракуратуры, праект Закона аб барацьбе з арганiзаванай злачыннасцю. У двух чытаннях прыняты праект закона, якi ўзмацняе адказнасць за злачынствы, звязаныя з карупцыяй.

У цэлым заканадаўчая дзейнасць праводзiлася ў рэчышчы забеспячэння балансу дзяржаўных i грамадскiх iнтарэсаў, комплекснага вырашэння заканадаўчых праблем. У сувязi з гэтым асаблiва хачу адзначыць знешне непрыкметную, але вельмi важную i карпатлiвую работу па ўпарадкаванню заканадаўства, адмене ўстарэлых актаў, устараненню няўзгодненасцi ў нормах кодэксаў i законаў.

Аператыўна дэпутацкi корпус адрэагаваў i на неабходнасць умацавання энергетычнай бяспекi краiны. Праведзены шэраг выязных мерапрыемстваў, у ходзе якiх дэпутаты дэталёва вывучылi перспектывы развiцця айчыннай энергетыкi, пытаннi ўкаранення энергазберагальных тэхналогiй у жыллёва-камунальнай гаспадарцы, прааналiзавалi заканадаўчыя праблемы ў гэтай галiне.

Больш дынамiчнай i, як вынiк, рэзультатыўнай была мiжнародная дзейнасць Палаты прадстаўнiкоў. У першую чаргу актыўнасць дэпутацкага корпуса была накiравана на стварэнне аптымальных умоў для вырашэння задач сацыяльна-эканамiчнага развiцця краiны, павышэнне яе iнвестыцыйнай прывабнасцi.

На працягу шостай сесii Палата прадстаўнiкоў прымала з рабочымi вiзiтамi парламентарыяў з Турцыi, Iзраiля, ПАР.

У Мiнску было праведзена пасяджэнне Агульнага камiтэта парламенцкай структуры Цэнтральнаеўрапейскай iнiцыятывы па пытаннях эканомiкi. У iм прынялi ўдзел парламентарыi з сямi краiн — удзельнiц гэтай Арганiзацыi. Адбылося чарговае пасяджэнне Савета Славянскага Парламенцкага Саюза.

У сваю чаргу дэпутаты Палаты прадстаўнiкоў наведалi Азербайджан, Арменiю, Iнданезiю, Iталiю, Казахстан, Лiтву, Расiю, Румынiю, Швецыю, прынялi ўдзел у мерапрыемствах Мiжпарламенцкага Саюза, Парламенцкай Асамблеi Чарнаморскага эканамiчнага супрацоўнiцтва, Парламенцкай Асамблеi ЕўрАзЭС, Мiжпарламенцкай Асамблеi СНД, Парламенцкага Сходу Саюза Беларусi i Расii.

Падкрэслю: дэпутаты не проста ўдзельнiчалi ў названых мерапрыемствах, але актыўна праводзiлi ў жыццё знешнепалiтычную i знешнеэканамiчную лiнiю нашай дзяржавы, фармiравалi ў вачах мiжнароднай грамадскасцi, замежных парламентарыяў пазiтыўны iмiдж Рэспублiкi Беларусь.

Паважаныя дэпутаты!

Завяршэнне сесii азначае перанос цэнтра цяжару нашай дзейнасцi ў выбарчыя акругi, хоць напружаная работа тут не спынялася i ў сесiйнны перыяд.

Дэпутаты прынялi больш як 8 тысяч грамадзян, правялi больш за 1200 сустрэч у працоўных калектывах, разгледзелi каля 8000 зваротаў.

Дадатковы рэсурс часу дасць магчымасць нам больш актыўна ўдзельнiчаць у вырашэннi рэгiянальных праблем, аказаннi дапамогi грамадзянам i, вядома ж, у правядзеннi iнфармацыйна-растлумачальнай работы з насельнiцтвам.

Гэты час неабходна максiмальна эфектыўна выкарыстаць i для падрыхтоўкi да асенняй сесii. Наперадзе — удзел у рабоце над праектам Закона аб бюджэце, Бюджэтнага i Зямельнага кодэксаў, законапраектамi ў сферах iпатэчнага крэдытавання, абароны правоў спажыўцоў.

З улiкам асаблiвай значнасцi пытання забеспячэння энергетычнай бяспекi краiны самых сур’ёзных адносiнаў запатрабуе законапраект «Аб нетрадыцыйных i аднаўляльных крынiцах энергii».

У цэнтры ўвагi павiнны заставацца пытаннi ўзмацнення аховы мацярынства i дзяцiнства, удасканалення пенсiйннага забеспячэння, развiцця аховы здароўя, фiзiчнай культуры i спорту.

На заканчэнне, паважаныя калегi, хачу падзякаваць вам за плённую работу i павiншаваць усiх прысутных з надыходзячым святам — Днём Незалежнасцi Рэспублiкi Беларусь.

Дазвольце пажадаць вам здароўя, шчасця, новых здзяйсненняў на карысць Радзiмы!

Работу шостай сесii Палаты прадстаўнiкоў Нацыянальнага сходу Рэспублiкi Беларусь трэцяга склiкання аб’яўляю закрытай.