АСЦЯРОЖНА, СВЯТА ЗАЧЫНЯЕЦЦА...

Источник материала:

Калi на гала-канцэрце «Васiльковая краiна» вядучыя абвясцiлi, што гран-пры (плюс, нагадаем, чэк на суму 5000 долараў) дастаецца Андрэю Кунцу, наш канкурсант, хоць i стараўся трымацца мужчынам, усё ж расплакаўся ад шчасця. Старшыня журы конкурсу Анiта Цой абняла маленькага артыста, а пазней упэўнена сказала: «У яго ўсё атрымаецца». З гэтым, у прынцыпе, згодная i мастацкi кiраўнiк Андрэя Святлана Стацэнка, якая толькi зараз дазволiла сабе расслабiцца i з задавальненнем прымала камплiменты i вiншаваннi ад калег ды журналiстаў. А чаму б i не — праграма-максiмум выкананая. Перамогу Андрэю прынеслi, нагадаем, патрыятычная песня «Мая Беларусь» i сапраўды дзiцячая, завадная «Сябруюць усе!».

Гэтаксама Андрэй Кунец i Арына Даронiна з Расii атрымалi прызы Пастаяннага камiтэта Саюзнай дзяржавы — лiчбавыя фотаапараты. Падарункамi былi адзначаны i беларуска Крысцiна Святлiчная, i расiянiн Леў Сапрыгiн. Спецыяльны прыз — ад Мiжнароднай федэрацыi фестывальных арганiзацый ФIДОФ — дастаўся Кылышбеку Жаксыбекаву з Казахстана, як самаму юнаму ўдзельнiку: яму ўсяго толькi 7 гадоў. Да слова, сёлетнi конкурс сапраўды дзiцячы — яго ўдзельнiкам ад 7 да 11 гадоў, так што журы не трэба было параўноўваць падлеткаў i зусiм маленькiх артыстаў. I ўсё адно, паводле слоў члена журы, украiнскага кампазiтара Вячаслава Ваяводзiна, «судзiць анёльчыкаў вельмi цяжка, хоць па абаянню, артыстызму i рэпертуару яны цiкавейшыя за дарослых». 1-ю прэмiю i 3 тысячы долараў павязе дадому «грузiнскi Раберцiна Ларэцi» Атар Андрыядзе, 2-ю прэмiю i 2 тысячы падзялiлi ўкраiнец Эрнест Дзярабiн i расiянка Арына Даронiна, на 3-й прыступцы з 1 тысячай прызавых — Кiкi з Боснii i Герцагавiны. Прыз сiмпатый журы быў прысуджаны Ноюсу Барташке з Лiтвы.

Фестываль жа сёння ўвечары будзе «згорнуты» — а 22-й гадзiне пачнецца канцэрт закрыцця XVI Мiжнароднага фестывалю мастацтваў «Славянскi базар у Вiцебску». У ноч з пятнiцы на суботу ў Летнiм амфiтэатры пройдзе праграма «Танцуй да ранiцы», прадстаўленая зоркамi маладзёжнай поп-культуры, сярод якiх чакаюцца госцi з Латвii i Швецыi.