BR15,5 МЛН — ЗА ЖОРСТКАЕ АБЫХОДЖАННЕ З ДЗЕЦЬМI

Источник материала:

Як паведамiлi ў Генеральнай пракуратуры Рэспублiкi Беларусь, нейкая Н. Кончыц выконвала апякунскiя абавязкi ў адносiнах да траiх малалетнiх. З красавiка 2003-га па кастрычнiк 2006 года яна сiстэматычна прыцягвала прыёмных дзяцей да цяжкай фiзiчнай працы. Рэчы i прадукты харчавання, якiя прывозiлiся дзецям з Iталii, а таксама пасылкi, што iм перадавалiся, выкарыстоўвала для ўласных патрэб. Жадаючы «адвучыць» дзяўчынку ад курэння, прыпалiла ёй запаленай цыгарэтай твар, ад чаго застаўся шрам. Неабгрунтавана падазраючы дзяўчынку ў крадзяжы прадуктаў харчавання з дому, прымусiла яе выпiць паўлiтра алею.

У вынiку была ўзбуджана крымiнальная справа па арт. 176 Крымiнальнага кодэкса (злоўжыванне правамi апекуна або папячыцеля). Як адзначаюць у Генпракуратуры, складанасць была ў тым, што ў следчых не было практыкi i методыкi расследавання гэтай катэгорыi спраў.

Па прыгавору суда Буда-Кашалёўскага раёна Н. Кончыц прызнана вiнаватай i ёй прысуджаны штраф у памеры 500 базавых велiчынь (Br15,5 млн). Па iску пракурора ў iнтарэсах непаўналетнiх пацярпелых з яе спагнана матэрыяльная кампенсацыя маральнага ўрону ў суме Br9 млн. Таксама пракуратура ўнесла прадстаўленне ў Буда-Кашалёўскi райвыканкам, па вынiках разгляду якога да дысцыплiнарнай адказнасцi прыцягнута 6 службовых асобаў райвыканкама. Цяпер дзецi знаходзяцца на выхаваннi ў другой прыёмнай сям’i.