Дагавор быць павiнен

Источник материала:

З. ХАДКЕВIЧ, г. Гродна.

Загадам Мiнжылкамгаса краiны ад 30 снежня 2006 года № 209 даручана кiраўнiкам абласных i Мiнскага гарадскога ўпраўленняў жыллёвай гаспадаркi, рамонтна-будаўнiчых арганiзацый галiны з 1 студзеня 2007 года на распачатых аб’ектах рамонту жылых дамоў забяспечыць заключэнне дагавораў памiж заказчыкам, падраднай арганiзацыяй i грамадзянiнам на выкананне рамонтна-будаўнiчых работ.

На стадыi праектавання капiтальнага рамонту жылога дома павiнна праводзiцца абавязковае абследаванне ўсiх канструктыўных элементаў дома i iнжынерных сiстэм з мэтай недапушчэння дадатковых аб’ёмаў работ, якiя выконваюцца ў працэсе рамонту. Праектная дакументацыя на капiтальны рамонт жылога дома падлягае ўзгадненню з зацiкаўленымi, разгляду ў дзяржаўнай экспертызе i зацвярджэнню ва ўстаноўленым парадку.

Пералiк асноўных вiдаў рамонтна-будаўнiчых работ, якiя выконваюцца пры капiтальным рамонце будынкаў, выкладзены ў дадатку А да СНБ 1.04-02-02 «Рамонт, рэканструкцыя i рэстаўрацыя жылых i грамадскiх будынкаў». На капiтальны рамонт павiнны ставiцца, як правiла, будынак (аб’ект) у цэлым або яго частка (секцыя, некалькi секцый). Пры неабходнасцi можа ажыццяўляцца капiтальны рамонт асобных канструктыўных элементаў будынка або аб’екта.

Не пазней за 30 дзён да пачатку правядзення капiтальнага рамонту дома павiнен быць праведзены сход жыльцоў дома з прадастаўленнем iм iнфармацыi (памяткi) аб вiдах i тэрмiнах правядзення рамонтных работ, арганiзацыi i тэхналогii iх правядзення. Пытаннi, што ўзнiмаюцца грамадзянамi ў перыяд правядзення капiтальнага рамонту i не патрабуюць дадатковага абследавання i разгляду з iншымi зацiкаўленымi, павiнны вырашацца неадкладна. Прыёмка выкананых рамонтна-будаўнiчых работ павiнна ажыццяўляцца па кожнай кватэры са складаннем акта, падпiсанага заказчыкам, падраднай арганiзацыяй i грамадзянiнам.