У надвор’я свае планы

Источник материала:

Багатаму ўраджаю на Брэстчыне спрыяла цёплая, не засушлiвая вясна. I напэўна, усё было б добра, калi б не зацяжныя дажджы i шквальны вецер на пачатку лiпеня.

Дасталося не толькi раёнам, якiя прылягаюць да Прыпяцi, але i самым паўночным у Брэсцкай вобласцi. Напрыклад, у многiх гаспадарках Баранавiцкага раёна палеткi нiбы пабывалi пад катком — збожжавыя прыбiтыя да зямлi. Найперш дасталося тым палям, дзе збожжа «стаяла сцяной». Дзе жыта рэдкае, там надвор’е нанесла меншую шкоду.

А вось Столiншчыну не толькi «ўкатала», але i залiло. У гэтым раёне пашкоджана да 80 працэнтаў збожжавых. Тут «ляжыць» каля 17 тысяч гектараў. Не лепшая сiтуацыя ў Лунiнецкiм, Пiнскiм, Iванаўскiм, Ганцавiцкiм раёнах. У апошнiм 6 тысяч гектараў сельгаскультур аказалiся падтопленымi i яшчэ 5 тысяч гектараў збожжавых палягло.

Усё ўскладняецца тым, што да вялiкага жнiва застаюцца лiчаныя днi i тая ж пшанiца ўжо не здолее падняцца, а палеглае збожжа нават замежнымi камбайнамi ўбiраць цяжка, ды i зерне ўжо не тое.

Дарэчы, у вобласцi да жнiва ўжо прыступiлi, але гэта толькi першыя крокi. Праўда, па першым умалоце, а ён у мiнулыя гады гаварыў, якiя цэнтнеры будуць у засеках у цэлым, можна сказаць, што чакаць рэкорднага намалоту не даводзiцца. Сярэдняя ўраджайнасць — у межах 28 ц/га, але паглядзiм, як будзе далей. Можа, хоць падчас жнiва надвор’е будзе спрыяць хлебаробам. А пакуль што яно хмурнае.