ПАРЫВIСТЫ ПОДЫХ НАВАЛЬНIЦЫ

Источник материала:

Як паведамiлi «Звяздзе» ў Мiнiстэрстве па надзвычайных сiтуацыях (МНС), ад моцнага ветру i навальнiцы пацярпелi 144 вёскi i гарады, дзе, у асноўным, былi пашкоджаны дахi дамоў, лiнii электраперадач, затоплены вулiцы, падвальныя памяшканнi. Чалавечых ахвяраў няма. Самы моцны ўдар стыхii прыйшоўся на Брэсцкую вобласць, дзе ахвярамi залеваў i парывiстага ветру сталi 134 населеныя пункты. Не абмiнула непагадзь тэрыторыю Мiншчыны i беларускую сталiцу. У вёсцы Кунцаўшчына Клецкага раёна ад удару маланкi загарэлася стайня. Пажар знiшчыў 20 коней. А ў вёсцы Гольчыцы Слуцкага раёна маланкавы разрад трапiў у будынак дзiцячага садка. На шчасце, нiхто не пацярпеў. Вось толькi дзеткi засталiся без даху над галавой: ён згарэў.

Некаторыя вулiцы Мiнска перажылi своеасаблiвы «патоп». У прыватнасцi, на некалькi гадзiн пад вадой апынуўся ўчастак Нямiгi. Аварыйным брыгадам Мiнiстэрства па надзвычайных сiтуацыях давялося выпампоўваць ваду з кавярнi па вулiцы Карла Маркса i з падвала па вулiцы Берута, дзе размешчана вузлавая станцыя РУП «Белтэлекам». Увогуле, паводка закранула 33 участкi сталiчных вулiц i спынiла рух на 35 тралейбусных, 27 аўтобусных, 8 трамвайных маршрутах, а таксама на некалькi гадзiн пакiнула без электрычнасцi жыхароў шэрагу дамоў. Супрацоўнiкi МНС падчас лiквiдацыi наступстваў стыхii дзейнiчалi аператыўна i зладжана. У блiжэйшы час выратавальнiкаў зноў чакае выпрабаванне навальнiцай. Паводле прагнозаў сiноптыкаў моцныя дажджы абрынуцца на Беларусь 26 i 27 лiпеня.