Калi будзем рабiць талiю?

Источник материала:

Iнфарм-укол

Лiшак тлушчу на жываце вымушае чалавека есцi больш, што, у сваю чаргу, прыводзiць да далейшага павелiчэння талii, лiчаць канадскiя вучоныя.

Вучоныя даследавалi гармон, якi лiчыцца моцным стымулятарам харчовай актыўнасцi. Гэты гармон уздзейнiчае на цэнтры насычэння i голаду ў галаўным мозгу, павялiчвае ўжыванне ежы, а таксама спрыяе росту колькасцi i памераў тлушчавых клетак. Раней лiчылася, што павышаны апетыт у "вялiкiх" людзей звязаны з залiшнiм выпрацоўваннем вышэйпамянёнага гармону ў галаўным мозгу. Канадцы высветлiлi, што i падскураная тлушчавая тканка здольная яго выпрацоўваць.

Дарэчы, адкладанне тлушчу ў вобласцi жывата лiчыцца найбольш небяспечнай формай атлусцення. Пры гэтым павялiчваецца рызыка сардэчна-сасудзiстых захворванняў, цукровага дыябету, а таксама некаторых вiдаў раку.

Алкаголь i тытунь паскараюць знiжэнне iнтэлекту

Шкодныя звычкi могуць паскорыць надыход хваробы Альцгеймера на 6—7 гадоў.

Амерыканскiя вучоныя вывучылi гiсторыi хвароб каля тысячы пацыентаў ва ўзросце пасля 60 гадоў, якiя пакутуюць ад хваробы Альцгеймера. Былi ўстаноўлены як аб’ёмы алкаголю i тытуню, якiя ўжывалiся гэтымi хворымi, так i наяўнасць гена, якi павялiчвае рызыку хваробы Альц-геймера. Было ўстаноўлена, што ў тых, хто штодня ўжываў звыш 30 грамаў чыстага алкаголю ў параўнаннi з тымi, хто наогул не пiў, хвароба развiвалася дзесьцi на пяць гадоў раней, а ў тых, хто курыў у параўнаннi з тымi, хто не курыў — на 2,3 года. У тых, хто i курыў, i злоўжываў алкаголем, падобныя праблемы з’яўлялiся на 6—7 гадоў раней. У сваю чаргу ген, "адказны" за хваробу Альцгеймера, паскараў надыход хваробы на 4 гады.

Вядучая рубрыкi Святлана БАРЫСЕНКА.