Мяркуецца вярнуць асобныя "чарнобыльскiя" льготы

Источник материала:

Як паведамiў начальнiк аддзела сацыяльнай абароны Дэпартамента па лiквiдацыi наступстваў катастрофы на Чарнобыльскай АЭС Мiнiстэрства па надзвычайных сiтуацыях Уладзiмiр Кудзiн, падрыхтаваны праекты двух указаў кiраўнiка дзяржавы, у адпаведнасцi з якiмi мяркуецца вярнуць некалькi "чарнобыльскiх" iльгот.

У прыватнасцi, гаворка вядзецца аб вяртаннi кампенсацыйных выплат (iх плануецца аднавiць з пачатку гэтага года), якiя прызначалiся за шкоду здароўю, атрыманую ў вынiку захворвання альбо калецтва ў сувязi з выкананнем работ па лiквiдацыi наступстваў аварыi на ЧАЭС. Да гэтай катэгорыi адносяцца грамадзяне, якiя часткова страцiлi працаздольнасць, аднак iм не была прызначана нi адна з груп iнвалiднасцi. Як заўважыў Уладзiмiр Кудзiн, агульная сума дадатковых выплат складзе каля 1 мiльярда рублёў у год. Унесены таксама прапановы аб iльготным крэдытаваннi вызначаных катэгорый "чарнобыльцаў" падчас будаўнiцтва жылля. Паводле меркавання Уладзiмiра Кудзiна, гэтыя меры (калi будзе прынята станоўчае рашэнне) дазволяць павысiць узровень сацыяльнай абароненасцi людзей, якiя пацярпелi ад катастрофы на Чарнобыльскай АЭС. Дарэчы, аднымi з найбольш абароненых сярод удзельнiкаў лiквiдацыi аварыi на ЧАЭС застаюцца iнвалiды І i II груп, лiчыць спецыялiст. Да прыкладу, сярэдняя пенсiя iнвалiдаў-чарнобыльцаў I групы складае 1,4 мiльёна рублёў у месяц, II групы — 1,1 млн, III групы — каля 600 тыс. рублёў.

Мiкалай ЛIТВIНАЎ.