Морква роўная, гладкая

Источник материала:

Рубрыку  вядзе  Валянціна Шпілеўская, тэл. 285 88 81

Каб морква была роўная, без наростаў, вопытныя агароднiкi за тры днi да высеву морквы палiваюць градку салёнай вадой. Усе агароднiкi ведаюць, што нельга высяваць моркву на ўчастку, дзе толькi што ўносiлi гной, таму што пры гэтым павялiчваецца колькасць разгалiнаваных караняплодаў. Некаторыя агароднiкi высяваюць моркву з попелам.

Перад высевам насенне морквы трэба змяшаць з сухiм жоўтым пяском — 5 г насення на паўлiтровы слоiк. На падрыхтаванай градцы робяцца баразёнкi, якiя трэба палiць вадой, у радочкi насыпаць драўнiнны попел, на якi высяваецца насенне морквы разам з пяском (на жоўтым пяску добра вiдаць насенне морвы). Па засеянай баразёнцы зноў пасыпаць попел, крыху прымяць рукой i засыпаць рыхлай зямлёй слоем 1,5 см. Попел — угнаенне для морквы, акрамя таго, ён адпужвае маркоўную муху: калi побач ёсць попел, муха не бывае такой настырнай. Пры такой сяўбе з пяском i прарэджваць моркву не даводзiцца, насенне кладзецца роўна i рэдка. А маркоўная муха, якая потым пачынае рабiць баразёнкi на дарослых караняплодах, пачынае сваю шкодную дзейнасць задоўга да ўборкi ўраджаю. Першы яе вылет адбываецца, калi цвiце чаромха i вiшня. Так што старайцеся ў гэты час не сеяць моркву, каб не спакушаць шкоднiка пахам насення. Другi аблёт яна робiць у пачатку лiпеня, калi ў морквы з’яўляюцца першыя лiсточкi. У асноўным iдзе першая праполка. Калi ўсё ж такi моркву даводзiцца прарэджваць, то як мага далей выносьце вырваную моркву разам з пустазеллем, зноў жа, каб не спакушаць шкоднiка. У гэты час моркву трэба апрацаваць любым iнсектыцыдам: дэцыс (0,1 л на га), шэрпа (0,2 л на га), сумi альфа (0,15—0,20 л на га). Калi не апрацаваць, муха адкладзе лiчынкi, якiя i робяць хады. У час захоўвання плод мае непрыемны выгляд i морква нясмачная, таму што шкоднiк жывiцца яе сокам з самага пачатку з’яўлення плода. На агародзе трэба чаргаваць радкi морквы з радкамi цыбулi, цi паблiзу высаджваць часнок. I цыбуля, i часнок адпужваюць шкоднiка. Праполку морквы лепш праводзiць пад вечар, а не ў самы поўдзень, калi муха бывае вельмi актыўная.

Некаторыя агароднiкi думаюць, што караняплоды буракоў i морквы дапамагаюць адзiн аднаму. Але, як вынiкае, буракi прыгнечваюць моркву, побач гэтыя культуры сеяць не варта.

Морква лепш за ўсё добра расце пасля тых культур, глеба пад якiя была запраўлена арганiкай: ранняй капусты i ранняй бульбы, таматаў, агуркоў, а таксама збожжавых, пасля цыбулi i кукурузы. Моркву не сеюць пасля кропу, сельдэрэя, пятрушкi, пастэрнака, фенхеля, кмену, каляндры. Непажадана сеяць моркву пасля буракоў, рэдзькi, радыскi, тапiнамбура.

(Адказ на другую частку пытання, Алiна Iосiфаўна, чытайце ў наступным выпуску.)