Абзац

Источник материала:

* Памяць ахвяраў генацыду армянскага народа ўшанавалі на жалобным мiтынгу ў Мiнску прадстаўнiкi армянскай дыяспары i пасольства Арменii ў Мiнску. Мерапрыемства прайшло каля помнiка Хачкар на Ваенных могiлках у Мiнску. Прысутныя ўспомнiлi 1915 год, калi ахвярамi сталi каля паўтара мiльёна армян. У храме ў iмя святога князя Аляксандра Неўскага адслужаны малебен.

* У Мастоўскiм раёне два хлопчыкі гулялi каля заправачнай станцыi. Сямiкласнiк спусцiўся ў паўпадвальнае памяшканне i забраўся ў ёмiстасць для бензiну, якая не выкарыстоўвалася. У хуткiм часе з бочкi данеслiся незразумелыя гукi, сябар хлопчыка спужаўся i пабег у вёску па дапамогу. Калi падлетка знайшлi, ён быў ужо нежывы — задыхнуўся парамі бензіну.

* Новы вiд дзiцячага абутку пазбавiць бацькоў ад частых паходаў па крамах: у Вялiкабрытанii ў продажы з’явiўся абутак, якi расце разам з нагою. З дапамогай спецыяльнай кнопкi такiя чаравiкi можна адаптаваць да памеру нагi ўладальнiка. Кошт навiнкi складае каля $100. Простым рухам яны могуць павялiчвацца больш чым на адзiнку памеру. Такi абутак iдэальна падыходзiць для дзяцей з рознымi памерамi ног.

* Учора ў Брэсце на даху iнструментальнага цэха электралямпавага завода адбылося ўзгаранне. У тушэннi было задзейнiчана шэсць пажарных разлiкаў, якiм спатрэбiлася 17 хвiлiн, каб лакалiзаваць агонь. Згарэлi старыя рулоны руберойду, якiя знялi з даху падчас рамонту. Людзi не пацярпелi i прадпрыемству ўрон не нанесены. Па папярэдняй версii, прычынай стала парушэнне тэхнiкi бяспекi.

* У Калiфорнii дрэсiраваны мядзведзь грызлi, якi здымаецца ў кiно, забiў свайго дрэсiроўшчыка. У аўторак тры вопытныя дрэсiроўшчыкi працавалi з мядзведзем па клiчцы Рокi. Мядзведзь укусiў за шыю аднаго з iх — 39-гадовага Стэфана Мiлера. Iншыя супрацоўнiкi адагналi мядзведзя з дапамогай перцавага спрэю. Урачы не змаглi вярнуць мужчыну да жыцця. Пасля расследавання мясцовыя ўлады вырашаць лёс мядзведзя. 5-гадовы Рокi ростам больш за 220 см i вагой 317 кг здымаўся ў фiльмах i сёлета ў лютым прызнаны "лепшым рабочым мядзведзем у бiзнэсе".

* Прааналiзаваўшы харчаванне 740 цяжарных жанчын, брытанскiя даследчыкi прыйшлi да высновы, што пол будучага дзiцяцi можа залежаць ад таго, колькi i што есць жанчына ў перыяд зачацця. Рацыён з высокай энергетычнай каштоўнасцю, у якiм прысутнiчаюць усе неабходныя пажыўныя рэчывы, дае 56-працэнтную гарантыю таго, што народзiцца хлопчык. А вось абмежаванне каларыйнасцi i пропуск снедання ў 55 працэнтах гарантуе нараджэнне дзяўчынкi. А паколькi апошнiм часам даволi часта жанчыны стараюцца есцi менш, то i працэнт хлопчыкаў сярод немаўлят знiжаецца прыкладна на 0,1 працэнта ў год. У коней, кароў, некаторых вiдаў аленяў i ў папуляцыях беспазваночных таксама назiраецца падобная з’ява. Ва ўмовах абмежаванасцi рэсурсаў у iх нараджаюцца "дзяўчынкi", бо яны дадуць менш патомства, чым сыны.

* У Гарадоцкiм раёне супрацоўнiкi мiлiцыi затрымалi грузавiк "Сканiя", на якiм перавозiлi 50 кароў. Суправаджальных дакументаў на жывы груз агульным коштам 50 мiльёнаў рублёў у кiроўцы не было. Аўтамабiль i рагатых пасажыраў затрымалi.

Поўны абзац

* Былы прэм’ер-мiнiстр Вялiкабрытанii Тонi Блэр быў выкрыты кандуктарам у спробе праехаць у цягнiку без бiлета. Ён ехаў на экспрэсе ў аэрапорт. Кандуктар прапанаваў купiць бiлет у яго, аднак у Блэра не аказалася з сабой наяўных грошай. Цi будзе ён аштрафаваны i чаму ехаў без бiлета, не паведамляецца. Кошт бiлета складаў 24,5 фунта стэрлiнгаў (49 долараў ЗША). Даходы Блэра толькi ад публiчных лекцый, па неафiцыйных звестках, летась перавысiлi мiльён долараў.