Аўтасалон прыгажосцi

Источник материала:

Відовiшча

Апошнi Мiнскi аўтасалон развiтваецца прыгожа. Як мы ўжо паведамлялi, з наступнага года свята на вулiцы беларускiх аўтааматараў будзе праходзiць пад брэндам "Мотаршоў". Магчыма, таму арганiзатары з ААТ "Рэмарк" вырашылi наладзiць пад дахам сталiчнага Футбольнага манежа запамiнальнае вiдовiшча. I гэта iм удалося. Столькi шыкоўных машын на адной пляцоўцы ў Мiнску яшчэ не збiралася. А дзяўчаты, якiя прэзентавалi аўтамабiлi, маглi б скласцi дастойную канкурэнцыю ўдзельнiцам самых прэстыжных конкурсаў прыгажосцi. Многiя мужчыны, якiя прыйшлi на аўтасалон, гублялi галаву не ад бляску iншамарак, а ад хараства паненак. Ахвотнiкаў сфатаграфавацца з прыгажунямi было не менш, чым тых, хто iмкнуўся "ўвекавечыць" сябе за рулём машыны сваёй мары.

Зрэшты, мара пра ўласнае шыкоўнае аўто — не такая ўжо недасягальная. Паводле слоў кiраўнiка ААТ "Рэмарк" Дзмiтрыя Яроты, апошнiм часам прыкладна 80 працэнтаў новых машын беларусы набываюць у крэдыт. Зразумела, што не ўсiм па кiшэнi набыць нават у крэдыт, напрыклад, "BMW 760Li" за 106 500 еўра. Аднак на аўтасалоне вялiкi выбар i гэтак званых бюджэтных мадэляў, коштам ад 6 тысяч долараў. Усяго на Мiнскiм аўтасалоне сёлета прадстаўлена больш за 200 машын такiх марак, як "Аlfа Rоmео", "BMW", "Сitrоеn", "Fоrd", "KIА", "Lаnd Rоvеr", "Mitsubishi", "Nissаn", "Vоlkswаgеn" i шэраг iншых вядомых брэндаў.

Да таго ж, узважыць свае фiнансавыя магчымасцi можна не выходзячы з выставы. Тут разгарнулi свае пункты кансультацыi банкi, якiя найбольш ахвотна крэдытуюць пакупнiкоў аўто. Дастаткова запоўнiць адмысловую анкету i банкаўскiя спецыялiсты тут жа скажуць, на якую суму крэдыту можна разлiчваць.

Таксама варта завiтаць на Футбольны манеж i тым спадарам i спадарыням, у якiх не хапае грошай на аўтамабiль. На аўтасалоне сёлета прэзентуецца вялiкая колькасць матацыклаў, квадрацыклаў i ровараў. Айчыннае прадпрыемства "Мотавела" наладзiла выставу не толькi сучаснай прадукцыi, але i рарытэтных матацыклаў "Мiнск". Словам, на сёлетнiм Мiнскiм аўтасалоне ёсць на што i на каго паглядзець. Папулярнасць выставы агромнiстая. Арганiзатары прагназуюць, што яе наведаюць больш за 50 тысяч чалавек. Мяркуючы па першых днях працы выставы, калi не толькi пад дахам Футбольнага манежа, але i на прылеглай да яго тэрыторыi яблыку не было дзе ўпасцi, гэты прагноз спраўдзiцца. Дарэчы, па просьбе наведвальнiкаў, дзверы манежа будуць адчынены да 21 гадзiны. Але, тым не менш, варта паспяшацца. Бо ўжо 4 мая Мiнскi аўтасалон завершыцца i чарговага свята падобнага кшталту давядзецца чакаць цэлы год.

Мiкола ДЗЯБЁЛА.