Ці належыць даплата магiстрам педагагiчных навук?

Источник материала:

З пытаннем наконт даплат магiстрам педагагiчных навук на "гарачую" лiнiю "Звязды" звярнулася настаўнiца адной са сталiчных школ. Па словах нашай чытачкi, яна ў 2007 годзе закончыла ў Беларускiм дзяржаўным педагагiчным унiверсiтэце iмя М. Танка магiстратуру, працавала i паралельна навучалася на вячэрнiм аддзяленнi. Але 10-працэнтную надбаўку, якую атрымлiваюць яе калегi са ступенню магiстра педагагiчных навук у iншых мiнскiх школах, яна чамусьцi не атрымлiвае.

Як патлумачылi журналiсту "Звязды" ў ЦК Беларускага прафсаюза работнiкаў адукацыi i навукi, iснуе пастанова Савета Мiнiстраў ад 12 чэрвеня 1997 года № 698, згодна з якой i сапраўды настаўнiкам са ступенню магiстра педагагiчных навук належыць 10-працэнтная надбаўка да тарыфнай стаўкi. Але прэтэндаваць на атрыманне надбаўкi могуць выпускнiкi педагагiчных спецыяльнасцяў толькi некалькiх беларускiх ВНУ, у тым лiку Беларускага дзяржаўнага педагагiчнага ўнiверсiтэта, Беларускага дзяржаўнага ўнiверсiтэта, БНТУ i Беларускага дзяржаўнага эканамiчнага ўнiверсiтэта. Ёсць таксама яшчэ адна важная ўмова для атрымання надбаўкi: настаўнiк-магiстр педагагiчных навук павiнен працаваць па размеркаваннi. Гэта значыць, што такая фiнансавая падтрымка дзейнiчае толькi на працягу двух гадоў, пакуль настаўнiкi маюць статус маладых спецыялiстаў.

Надзея НІКАЛАЕВА.