У водпуск — усёй сям’ёй

Источник материала:

Летась мне нехта казаў, што ў заканадаўстве ёсць такая агаворка: калi муж i жонка працуюць на адным прадпрыемстве, то працоўны водпуск iм павiнны даваць разам. Цi так гэта?

Святлана Ярмалюк, г. Брэст.

Парадак прадастаўлення працоўных водпускаў работнiкам рэгулюецца Працоўным кодэксам Рэспублiкi Беларусь.

У Кодэксе адсутнiчаюць нормы, якiя абавязваюць наймальнiка прадастаўляць працоўны водпуск адначасова мужу i жонцы, калi яны працуюць на адным прадпрыемстве. Тым не менш, Кодэкс усё ж утрымлiвае артыкулы, якiя абавязваюць наймальнiка прадаставiць водпуск мужу (жонцы) адначасова з водпускам другой палавiны, але гэта не залежыць ад таго, на адным прадпрыемстве яны працуюць цi ў розных месцах.

Так, згодна з артыкулам 166 Кодэкса, працуючай жонцы (мужу) ваеннаслужачага, па яе (яго) жаданні, працоўны водпуск прадастаўляецца адначасова з водпускам мужа (жонкi).

Артыкулам 168 Кодэкса прадугледжана, што пры складаннi графiка водпускаў на каляндарны год наймальнiк абавязаны запланаваць водпуск па жаданнi работнiка, жонка якога знаходзiцца ў водпуску па цяжарнасцi i родах, — у перыяд гэтага водпуску, а па жаданнi працуючай жонкi (мужа) ваеннаслужачага — адначасова з водпускам мужа (жонкi).

Тым не менш, наймальнiк, згодна з артыкулам 7 Кодэкса, мае права ўстанаўлiваць дадатковыя працоўныя i iншыя гарантыi для работнiкаў у параўнаннi з заканадаўствам аб працы. Калектыўным дагаворам, якi iснуе на прадпрыемстве, можа быць устаноўлена права работнiкаў — мужа i жонкi, якiя працуюць разам на гэтым прадпрыемстве, выкарыстоўваць водпуск адначасова. Паколькi калектыўны дагавор з’яўляецца лакальным нарматыўным прававым актам, то выкананне замацаваных у iм палажэнняў абавязковае для наймальнiка.