Дапамогі на дзяцей "прывяжуць" да заробкаў?

Источник материала:

На працягу студзеня—красавiка ў Беларусi нарадзiлася 33 986 дзяцей, што на 6,3 працэнта больш леташняга. Адным з тлумачэнняў гэтага стала прадстаўленне дадатковых гарантый сем’ям. Прычым, як паведамiла падчас сустрэчы з журналiстамi намеснiк начальнiка галоўнага ўпраўлення палiтыкi занятасцi i народанасельнiцтва Мiнiстэрства працы i сацыяльнай абароны Таццяна Шэметавец, чакаецца, што ўжо ў чэрвенi будуць падрыхтаваны прапановы па павелiчэннi дапамогi на дзяцей ва ўзросце да 3 гадоў да 100 працэнтаў бюджэту пражытковага мiнiмуму.

Адначасова дадатковым стымулам для павелiчэння нараджальнасцi павiнна стаць змяненне правiлаў вызначэння дапамог на дзяцей ва ўзросце да 3 гадоў. Сёння ёсць прапанова разлiчваць дапамогi зыходзячы не ад бюджэту пражытковага мiнiмуму, а прапарцыянальна сярэднiм заробкам. Плюс да таго, зараз вывучаюцца магчымасцi павелiчэння працягласцi водпуску па цяжарнасцi i родах. Гаворка тут iдзе аб павелiчэннi пасляродавага водпуску ўсiм будучым мацi, а таксама дародавага водпуску мацi, якiя пражываюць у чарнобыльскай зоне.

Мiж тым, паводле слоў галоўнага педыятра Мiнiстэрства аховы здароўя Алены Нявера, апошнiм часам становiцца ўсё больш актуальнай iншая праблема — выкарыстанне дзяржаўных гарантый. Пачасцiлiся выпадкi, калi мацi працягваюць працаваць да 36—37 тыдняў цяжарнасцi, выпадкi датэрмiновага спынення "дэкрэтных". У любым выпадку прыход у дзiцячы калектыў — не толькi стрэс, але i верагоднасць пазнаёмiцца з 15—20 новымi iнфекцыямi. І пажадана, каб такое "знаёмства" адбылося ўжо пасля 3-гадовага ўзросту — калi праведзена асноўная вакцынацыя i калi ў асноўным ужо сфармiраваўся арганiзм дзiцяцi.

Сяргей ГРЫБ.