"Небяспечныя сувязi" пад музыку

Источник материала:

Культасвета

Знакамiты скандальны раман французскага пiсьменнiка Шадэрло дэ Лакло, якi амаль два стагоддзi ўзбуджае чытацкую цiкавасць, не раз быў перакладзены на мову кiно. А вось у фармаце мюзiкла ён увасоблены ўпершыню. За рэалiзацыю гэтага праекта ўзялася беларуская творчая каманда — мастацкi кiраўнiк прадзюсарскага цэнтра "Спамаш", кампазiтар Уладзiмiр Кандрусевiч, акцёр i рэжысёр (ды яшчэ дэпутат Палаты прадстаўнiкоў Нацыянальнага сходу Беларусi) Генадзь Давыдзька, мастак-пастаноўшчык Венiямiн Маршак.

Вопыт сумеснай работы ў гэтых людзей не першы — яны ўжо ставiлi разам дзiцячы мюзiкл "Афрыка", якi дагэтуль з поспехам iдзе ў некалькiх беларускiх тэатрах. Але "Байкер" — менавiта так называецца беларуская пастаноўка, у якой дзеянне перанесена ў сучаснасць — абяцае стаць новым словам у гiсторыi мюзiклаў.

Пачаць хоць бы з таго, што даволi лёгкi жанр пастаноўшчыкi збiраюцца выкарыстаць... для барацьбы з "папсой". "Мы хочам зрабiць вельмi жорсткую гiсторыю, з вялiкай колькасцю вострых момантаў, перцу. Усё будзе горка, нават гумар, — разважае рэжысёр-пастаноўшчык Генадзь Давыдзька. — Гледача трэба адарваць ад "папсы", усiх гэтых тра-ля-ля, i паказаць, што хопiць "трапаць" слова "каханне" па ўсiх кутах, з нагоды i без. Ёсць у мяне тайная задума — спачатку разбэсцiць гледача, даць адчуць, якi салодкi i прывабны парок, а потым пакараць за гэта адчуванне i ачысцiць душу. Па жанру гэта ўвогуле будзе аптымiстычная трагедыя, гэткая своеасаблiвая лазня для душы. Хочацца спадзявацца, што глядач будзе выходзiць з залы крыху iншым, больш уважлiвым да тых, хто яго кахае i каго кахае ён".

Другая адметнасць — мюзiкл плануецца зрабiць не маштабным i поўным дарагiх дэкарацый, а камерным i досыць малабюджэтным. Пастаноўка, паводле слоў аўтараў, разлiчаная пераважна на залы да 1 тысячы гледачоў, каб не ўразiць усiх вонкавай пышнасцю, але стварыць своеасаблiвую, "тэатральную" атмасферу. Не ставiцца мэта i камерцыйнай паспяховасцi "Байкера". Хоць фiнансавы бок справы заўчасна не раскрываецца, але пастаноўшчыкi пацвердзiлi, што першаснае для iх — зрабiць якасную мастацкую пастаноўку, а не акупляльнае шоў.

Па сюжэту, у цэнтры мюзiкла "Байкер" дзве моцныя асобы — гаспадыня начнога клуба Элеанора i папулярны рэжысёр, ён жа байкер Франк. Жадаючы адпомсцiць сваiм ворагам, абодва задумваюць складаную iнтрыгу, але ўсе карты i планы блытае каханне... Усё гэта — з вялiкай колькасцю эмацыянальнай, насычанай музыкi, пластычных сцэн, харэаграфiчных пастановак, яркiх касцюмаў, вiдэаэфектаў i блiскучых дыялогаў. Ролi галоўных персанажаў, дарэчы, атрымалiся настолькi напружанымi i тэхнiчна складанымi для выканання, што iх выконваюць два саставы акцёраў. Элеанору па чарзе ўвасабляюць спявачка Венера i маладая артыстка ПЦ "Спамаш" Дарыя, а на ролю байкера Франка цудоўна падышоў удзельнiк каманды КВЗ "ЧП", салiст гурта "One hell thing" Ван Хельсiнг (Iван Вабiшчэвiч). "За два месяцы рэпетыцый у мяне адчуванне, што я прайшоў 5 гадоў тэатральнай школы. I ўсё гэта — дзякуючы рэжысёру", — адзначае Ван Хельсiнг. У iншых ролях — а ўсяго ў мюзiкле 6 асноўных персанажаў i трупа з 12 прафесiйных танцораў — занятыя маладыя беларускiя артысты, а таксама амаль усе выканаўцы з прадзюсарскага цэнтра "Спамаш". Iм, з аднаго боку, давялося вучыцца не толькi спяваць, але i рухацца, iграць, жыць на сцэне; з другога — некаторыя партыi адмыслова былi прапiсаныя пад канкрэтных выканаўцаў.

Прэм’ера мюзiкла ў Мiнску запланаваная на сярэдзiну восенi, пляцоўка для паказу пакуль што выбiраецца. Але да гэтага ў артыстаў не будзе часу разняволiцца — цяпер завяршаюцца рэпетыцыi (пераважна на "гасцявых" сцэнах, бо свайго памяшкання ў трупы няма), і ўжо пачаўся перадпрэм’ерны тур "Байкера" па Беларусi. Першае выступленне адбылося ў Гродне, далей на чарзе — Брэст, Бабруйск, Магiлёў, Маладзечна, Вiцебск. Ёсць памкненнi паставiць мюзiкл на сцэне "Славянскага базару", а пазней — за межамi Беларусi. Так што ў хуткiм часе паглядзiм, якiя яны, гэтыя "Небяспечныя сувязi" ў сучасным прачытаннi...

Вiкторыя ЦЕЛЯШУК.