Рамуальда Кліма павiншавалi з юбiлеем

Источник материала:

Учора ў Нацыянальны алiмпiйскiм камiтэце з 75-гадовым юбiлеем вiншавалi алiмпiйскага чэмпiёна Гульняў-1964 у Токiо i сярэбранага прызёра Алiмпiяды-1968 у Мехiка Рамуальда Клiма. Прадстаўнiкi НАК, Мiнiстэрства спорту i турызму, "каралевы спорту" ўручылi iмянiннiку кветкi i падарункi. Асаблiва ўзрушыў чэмпiёна прэзент ад вядомага беларускага малатабойца Івана Цiхана, якi падараваў iмянны значок Алiмпiйскiх гульняў, зроблены з золата па спецыяльным заказе. Такую пашану лёгка зразумець: у кiданнi молата Цiхан раўняўся на свайго папярэднiка, пераймаў усё лепшае, i — цяпер ён ужо трохразовы чэмпiён свету, сярэбраны прызёр Алiмпiйскiх гульняў.

Нягледзячы на свой "сур’ёзны" ўзрост, Рамуальд Iосiфавiч не сядзiць без справы: рэкардсмен свету, Еўропы i СССР з’яўляецца кансультантам кафедры лёгкай атлетыкi Беларускага дзяржаўнага ўнiверсiтэта фiзкультуры i спорту. Паводле слоў галоўнага трэнера каманды па лёгкай атлетыцы Анатоля Бадуева, тэхнiка кiдання молата Клiма i цяпер лiчыцца эталонам, але чэмпiён знакамiты не толькi сваiмi спартыўнымi дасягненнямi, але i талентам... расказваць анекдоты. Кажуць, Рамуальд Iосiфавiч ведае iх не менш за 200.

Дарэчы, сёння ў "Стайках" пачынаецца традыцыйны мiжнародны турнiр па лёгкаатлетычных кiданнях молата, дыска i кап’я на прызы Рамуальда Клiма. Упершыню гэтыя спаборнiцтвы былi праведзеныя ў 1976-м. У сёлетнiм турнiры свае сiлы напярэдаднi Алiмпiяды ў Пекiне хочуць праверыць лiдары беларускай зборнай Iван Цiхан, Павел Лыжын, Надзея Астапчук, Iрына Ятчанка i iншыя. Пажадалi ўзяць удзел i замежныя спартсмены з Польшчы, Азii i арабскiх краiн. Урачыстае адкрыццё спаборнiцтваў запланаванае на 14 гадзiн. У першы дзень будуць выступаць мужчыны, у другi — жанчыны.

Iрына ПРЫМАК.