Абзац

* У адпаведнасцi з нацыянальным заканадаўствам права на водпуск па доглядзе дзiцяцi ва ўзросце да 3 гадоў прадастаўляецца не толькi мацi, але i бацьку, блiзкiм родзiчам. Гэтым правам у Беларусi скарысталiся 2 тыс. 25 татаў, трое дзядуляў i 29 бабуль. На 1 студзеня сёлета ў такiм адпачынку знаходзiлiся 205 тыс. 513 мацярок.

* Да 2010 года ў парк самалётаў Нацыянальнай кампанii "Белавiя" будуць уваходзiць толькi машыны замежнай вытворчасцi. Савецкiя самалёты будуць выведзеныя з эксплуатацыi, iх месца зоймуць "Boei* g" i "CRJ". Сёння "Белавiя" выкарыстоўвае 4 самалёты "Ту-154-М", якiя мяркуецца ў хуткiм часе замянiць. 15 чэрвеня плануецца даставiць у Мiнск "Boei* g 737-300", а чарговы "CRJ" — у чэрвенi-лiпенi. Выведзеныя з эксплуатацыi самалёты будуць перададзеныя ў арэнду iншым авiякампанiям.

* Самай лепшай мiнеральнай вадой на конкурсе дэгустацыi "ГУСТ", што праводзiлася ў рамках выстаўкi "Харчовая iндустрыя", прызнана мiнеральная лячэбна-сталовая вада "Нарачанская-1", якую вырабляе Нарачанскi завод напояў. Яе рэкамендуюць пiць пры хранiчных гастрытах з нармальнай i знiжанай сакраторнай функцыяй страўнiка, хранiчных захворваннях печанi, панкрэатытах, парушэннях абмену рэчываў. Лепшым квасам прызнаны "Старажытны" ААТ "Крынiца".

* На тэрыторыi Мiнска i ў прыгарадных зонах адпачынку выяўлена 8 ачагоў, заселеных кляшчамi. Гэтыя насякомыя выяўлены ў лясных масiвах Сляпянкi, Сцяпянкi, у раёне вулiцы Цiкоцкага, у зялёнай зоне вулiц Сцебянёва i Сялiцкага, а таксама ў лясных масiвах каля вадасховiшчаў Заслаўскае, Крынiца, Дразды. У лячэбныя ўстановы сталiцы звярнулiся сёлета каля 900 ахвяраў укусаў кляшчоў, з iх 725 чалавек — за апошнi месяц. Аднак большасць з iх пацярпелi ад укусаў не ў сталiцы, а ў час знаходжання на дачы цi ў лесе.

* За чатыры месяцы сёлета супрацоўнiкi iнспекцыi МНС па падатках i зборах па Савецкiм раёне г. Мiнска выявiлi 15 грамадзян, якiя здавалi ўнаём жыллё без аплаты фiксаваных сум падаходнага падатку. Гэтыя людзi былi пастаўленыя на падатковы ўлiк, прыцягнуты да адмiнiстрацыйнай адказнасцi. Дадаткова ў бюджэт паступiла Br4 млн.

* У прыгранiчнай з РФ правiнцыi Кiтая ўзарвалiся хiмiчныя боепрыпасы часоў Другой сусветнай вайны. У вынiку загiнулi тры чалавекi. Якiя менавiта хiмiчныя рэчывы трапiлi ў навакольнае асяроддзе, не ўдакладняецца. Мiнпрыроды Расii накiравала Кiтаю ноту пратэсту з-за ўтойвання iнфармацыi пра iнцыдэнт.

* Даходы карупцыянераў Расii складаюць каля трэцi дзяржаўнага бюджэту — прыкладна $30 млрд у год. Аб гэтым гаварылася на калегii Следчага Камiтэта пры пракуратуры РФ.

* Беларускiя памежнiкi прыступiлi да знiшчэння дзiкарослага маку паблiзу мяжы. Вырашана працаваць на апераджэнне, не даючы раслiне паспець, i тым самым прадухiлiць магчымыя паломнiцтвы наркаманаў. 5 чэрвеня брэсцкiя памежнiкi паблiзу вёскi Борысы сумесна з супрацоўнiкамi Брэсцкага РАУС выкасiлi 150 кг маку на плошчы 1 га.

* У Калiнiнградскай вобласцi расследуюцца прычыны выбуху i пажару на сухагрузе "Енiсей". У вынiку надзвычайнага здарэння тры чалавекi загiнулi, яшчэ сямёра лiчацца прапалымi без вестак, трое дастаўлены ў бальнiцу. Па папярэднiх звестках, прычынай магла стаць дэтанацыя пароў у палiўных баках сухагрузу.

* Урад Канады прапанаваў уладальнiкам старых машын за адмову ад iх выкарыстання кампенсацыю ў выглядзе бясплатных веласiпедаў, праязных на грамадскi транспарт альбо наяўных грошай. Па звестках уладаў, з 18 млн машын у Канадзе каля 5 млн былi выпушчаныя да 1996 года, калi ўвялi больш жорсткiя стандарты па выкiдах у атмасферу. Пры гэтым старыя аўтамабiлi спажываюць больш палiва i выкiдваюць у паветра ў 19 разоў больш шкодных рэчываў, чым новыя мадэлi. Нацыянальная праграма замены старых аўтамабiляў абыдзецца Ўраду прыкладна ў 90 млн долараў.

Поўны абзац