Шпацыр супраць аўтобуса

Источник материала:

У гадзiну пiк кампенсуючы аўтобус № 33, якi перавозiць пасажыраў метро ад станцыi "Плошча Перамогi" да станцыi "Кастрычнiцкая", часам можна без асаблiвых цяжкасцяў абагнаць пехатою.

Што днямi а 19-й гадзiне вечара разам са шматлiкiмi iншымi пасажырамi i зрабiў карэспандэнт газеты. З жонкай мы нават некалькi разоў даганялi i пераганялi папярэднi аўтобус, а той, у якi мы маглi тэарэтычна сесцi, абагнаў нас пад узгорак на апошнiх дзесятках метраў (адзiн я звычайна хаджу хутчэй). Вынiк паралельнага шпацыру i язды — каля 12 хвiлiн.

Ёсць i пэўныя станоўчыя невялiкiя зрухi. Адпаведныя гарадскiя службы, вiдаць, апошнiм часам уважлiва чытаюць прэсу наконт сiтуацыi з новай схемай руху транспарту з-за рэканструкцыi на перасадачным вузле метрапалiтэна. У тым лiку i "Звязду". Бо некаторыя прыпынкi (з той жа Плошчы Перамогi) перанеслi блiжэй да ўваходу ў метро, "развёўшы" яго з прыпынкам для аўтобуса № 100.

На дзвярах уваходаў нарэшце з’явiлася iнфармацыя, што працуе аўтобусны маршрут № 33. Для iншагародняга гэта зручна i патрэбна. Праўда, мы гаварылi яшчэ i пра неабходнасць з’яўлення спецыяльных картаў-схем. Зараз жа ў Мiнску праходзiць цэнтралiзаванае тэсцiраванне, у горад з’ехалася шмат абiтурыентаў i iх бацькоў з iншых мясцiн краiны. Ім такая iнфармацыя патрэбна менавiта цяпер, зрэшты, як надалей i iншым гасцям сталiцы.

Сяргей РАСОЛЬКА.