У аздараўленчых лагерах — бяспека!

Источник материала:

Лета-2008

Па словах начальнiка ўпраўлення прафiлактыкi галоўнага ўпраўлення аховы правапарадку i прафiлактыкi мiлiцыi грамадскай бяспекi Мiнiстэрства ўнутраных спраў Мiкалая Дразда, менавiта ўсяму гэтаму павiнна садзейнiчаць дзейнасць прафiлактычных службаў мiлiцыi. Супрацоўнiкi якiх далi для бацькоў i родных дзетак самую падрабязную справаздачу.

Па-першае, яшчэ на падрыхтоўчым этапе сумесна з прадстаўнiкамi МНС было праведзена абследаванне аздараўленчых лагераў для забеспячэння захаванасцi дзяржаўнай i асабiстай маёмасцi будучых адпачываючых i абслуговага персаналу, а таксама правiлаў пажарнай бяспекi.

Па-другое, у лагерах органамi ўнутраных спраў ужо прыняты неабходныя меры. У прыватнасцi, у кожным такiм загарадным месцы ўжо вядзецца кругласутачнае нясенне службы супрацоўнiкамi мiлiцыi.

Па-трэцяе, супрацоўнiкамi цэнтральнага апарату мiнiстэрства на лета запланаваны рэгулярныя выезды на месцы дыслакацыi аздараўленчых лагераў.

Па-чацвёртае, на перыяд канiкулаў дзве трэцi асабовага складу iнспекцый па справах няпоўнагадовых пераведзена для работы ў вячэрнi i начны час.

Па-пятае, у кожным рэгiёне вызначаны крымiнальныя месцы i катэгорыi падлеткаў (у першую чаргу — асуджаных да мераў пакарання, не звязаных з iзаляцыяй ад грамадства, i з выкарыстаннем iншых мераў крымiнальнай адказнасцi; няпоўнагадовых, якiя вярнулiся з выхаваўчых калонiй, спецыяльных вучэбна-выхаваўчых устаноў; дзяцей з няўдалых сем’яў), якiя маюць патрэбу ў прафiлактычным уздзеяннi...

Гэта не гаворачы пра правядзенне напярэдаднi летняга перыяду ва ўсiх навучальных установах тыдня прававых ведаў, падчас "апошнiх званкоў" — выступленняў работнiкаў мiлiцыi перад падлеткамi i iх бацькамi адносна правiлаў паводзiнаў на дарогах, вадзе.

Акрамя таго, Мiнiстэрства ўнутраных спраў сумесна з зацiкаўленымi бакамi стварае ваенна-патрыятычныя i абаронна-спартыўныя лагеры. Дарэчы, на працягу мiнулага лета на тэрыторыi краiны дзейнiчала 220 такiх лагераў, у тым лiку 147 — на базе вайсковых часцей i падраздзяленняў МУС, дзе прайшлi аздараўленне i спасцiглi азы воiнскай службы больш за 10 тысяч дзяцей. Сёлета такая практыка будзе падоўжана не толькi летам, але i падчас восеньскiх, зiмовых i веснавых канiкулаў. Прычым, з павелiчэннем iх колькасцi.

Прыклад — ваенна-патрыятычны лагер для "цяжкiх" падлеткаў i кадэтаў ваенна-прававых класаў вячэрняй сярэдняй агульнаадукацыйнай школы № 21 Фрунзенскага раёна г. Мiнска.

Пры тэрытарыяльных органах унутраных спраў арганiзавана работа падлеткавых клубаў, у якiх больш за палову няпоўнагадовых стаяць на ўлiку ў iнспекцыях па справах няпоўнагадовых. Для заняткаў з "цяжкiмi" падлеткамi прыцягваюцца i работнiкi iншых зацiкаўленых ведамстваў, у тым лiку педагогi, юрысты, псiхолагi.

Разам з камiсiямi па справах няпоўнагадовых органамi i ўстановамi адукацыi, спорту i турызму, цэнтрамi занятасцi насельнiцтва выяўляюцца непрацуючыя падлеткi i тыя, хто не вучыцца. Яны ўладкоўваюцца на працу. Памiж органамi ўнутраных спраў наладжаны абмен iнфармацыяй у дачыненнi да асобаў, якiя стаяць на прафiлактычным улiку ў iнспекцыях па справах няпоўнагадовых, i выязджаюць на аздараўленне або да родных, падчас якога неабходныя звесткi накiроўваюцца ў тэрытарыяльныя АУС па месцы дыслакацыi аздараўленчых лагераў (месцаў пражывання родных).

Пад жорсткi кантроль узяты паводзiны няпоўнагадовых, якiя стаяць на прафiлактычным улiку ў iнспекцыях па справах няпоўнагадовых, асаблiва асуджаных судамi да мераў пакарання, не звязаных з пазбаўленнем волi.

Падрыхтаваў Сяргей РАСОЛЬКА.