«Спачатку бульдозер — потым сход»

"На прыкладзе будаўнiцтва вышыннага шматфункцыянальнага бiзнэс-цэнтра мы, на жаль, сутыкнулiся з тыповай праявай бюракратычных адносiнаў адмiнiстрацыйных структур да меркавання грамадзян. Так, у адказе намеснiка старшынi Мiнгарвыканкама Н.А. Ладуцькi паведамляецца, што "па найбольш хвалюючых тэмах жыхарам гэтага квартала неаднаразова давалася пiсьмовая iнфармацыя па будаўнiцтве згаданага аб’екта". Але абсалютна нiякай дадатковай iнфармацыi мы не атрымлiвалi!

Складваецца ўражанне, што ўсiмi праўдамi i няпраўдамi гарадскiя ўлады стараюцца без улiку крытычных меркаванняў грамадзян дабiцца рэалiзацыi гэтага праекта. Без сумненняў, будаўнiцтва бiзнэс-цэнтра ў вельмi зручным месцы горада прынясе iнвестару (расiйская нафтагазавая кампанiя "Iтэра") вялiкi прыбытак, а Мiнгарвыканкам атрымае дадатковыя сродкi для рэалiзацыi iншых праектаў. Але не за кошт зручнасцяў, здароўя i бяспекi тысяч грамадзян.

Бо невыпадкова аб неабходнасцi ўважлiвых адносiнаў да людзей у працэсе рэканструкцыi гарадоў гаварыў Прэзiдэнт Беларусi Аляксандар Лукашэнка на сустрэчы ў Мiнску з архiтэктарамi ў гарадской ратушы ў маi г.г. Ён падкрэслiў, што цяпер няма праблем з iнвестыцыямi ў добраўпарадкаванне горада. Задача ўлады, па яго словах, у гэтай сiтуацыi зводзiцца да выбару такiх праектаў, якiя ўпрыгожаць горад i зробяць яго яшчэ больш зручным для жыцця.

А праект будаўнiцтва бiзнэс-цэнтра, мяркую, не адрознiваецца арыгiнальнасцю i не ўпрыгожыць горад, а, хутчэй, пагоршыць сацыяльна-эканамiчныя ўмовы жыцця тысяч грамадзян".

"Як удзельнiца сустрэчы жыхароў дамоў №№ 4, 6, 10, 30, 36 па вулiцы Максiма Танка з прадстаўнiкамi зацiкаўленых арганiзацый, сведчу, што нiякага "грамадскага абмеркавання" будаўнiцтва бiзнэс-цэнтра не было. Усе выступленнi чыноўнiкаў зводзiлiся да падкрэслiвання адной думкi: рашэнне аб узвядзеннi бiзнэс-цэнтра прынята даўно аўтарытэтнымi органамi i будзе абавязкова выканана ў намечаныя тэрмiны. Такi характар носяць i адказы адмiнiстрацыi Цэнтральнага райвыканкама i Мiнгарвыканкама на пiсьмы жыхароў дамоў па вулiцы Максiма Танка. У пiсьмах, лічу, няма адказаў на пастаўленыя пытаннi".

"Цi варта ўзводзiць хмарачосы ў густанаселеным раёне горада, не маючы адпаведнага вопыту i нарматыўна-прававой базы? Зразумела, не, скажа амаль кожны мiнчанiн. Адна з дзвюх вежаў бiзнэс-цэнтра будзе вышынёй 217 метраў. Гэта ў два з паловай разы вышэй, чым будынак Нацыянальнай бiблiятэкi. А яна, мiж iншым, адна з самых высокiх пабудоў сталiцы.

20—21 мая г.г. у Мiнску праходзiла мiжнародная канферэнцыя "Вопыт узвядзення вышынных будынкаў i будаўнiцтва ўнiкальных аб’ектаў у краiнах СНД i Еўрасаюза". На ёй выступiў намеснiк мiнiстра архiтэктуры i будаўнiцтва Анатоль Нiчкасаў, якi, у прыватнасцi, заявiў, што ў блiжэйшы час трэба ўвесцi ў дзеянне нормы праектавання i будаўнiцтва будынкаў вышынёй звыш 75 метраў. Яны, па яго словах, павiнны ахапiць увесь спектр праблем узвядзення вышынных будынкаў: вялiкiя нагрузкi, складаныя iнжынерныя сiстэмы, сiстэмы бяспекi i эвакуацыi ў надзвычайных сiтуацыях i г.д. Такая нарматыўная база, згодна з выступленнем А. Нiчкасава, знаходзiцца пакуль у працэсе распрацоўкi.

Няцяжка заўважыць, што выступленне намеснiка мiнiстра закранала найперш тэхнакратычны бок гэтых нарматыўных патрабаванняў. У iх не ўтрымлiваецца сацыяльна-гуманiтарных крытэрыяў i патрабаванняў, звязаных з асаблiвасцямi пэўных раёнаў, павышэннем якасцi жыцця iх насельнiкаў, абаронай iх фiзiчнага i псiхiчнага здароўя, забеспячэннем iх бяспекi не толькi ўнутры вышынных будынкаў, але i вакол iх.

Улiчваючы складанасць i шматграннасць гэтай праблемы, было б правiльным увядзенне ў практыку судоў усiх ступеняў, у тым лiку Канстытуцыйнага i Вярхоўнага, строгi кантроль за працэсам распрацоўкi i рэалiзацыi зацверджаных Прэзiдэнтам i Ўрадам Беларусi нарматыўных патрабаванняў да вышыннага будаўнiцтва".

"Здзiўляе перакананасць чыноўнiкаў у тым, што будаўнiцтва на месцы сквера дзвюх вежаў-хмарачосаў, паркiнга i 30-павярховага жылога дома "адпавядае сучасным тэндэнцыям развiцця горадабудаўнiчага асяроддзя сталiчнага цэнтра".

Наколькi мне вядома, нi ў адной еўрапейскай сталiцы хмарачосы не ўзводзiлiся ў раёнах жылой забудовы 6—9-павярховых дамоў, як гэта робiцца па вулiцы Максiма Танка. Хмарачосы па эстытычных меркаваннях i меркаваннях бяспекi патрабуюць вакол сабе адкрытай прасторы. Нездарма нi ў Санкт-Пецярбургу, нi ў Парыжы гэтага сабе не дазволiлi. У Парыжы быў створаны асаблiвы раён для вышынных будынкаў: бiзнэс-цэнтраў i гатэляў".

"Шаноўны спадар Ладуцька! Няўжо вы думаеце, што нам, жыхарам яшчэ пакуль прыгожага горада, абрыдзеў яго натуральны зялёны ландшафт, якi мудра збераглi славутыя архiтэктары Кароль, Заборскi, Грыгор’еў? Няўжо вы лiчыце, што нам будзе прыемна i радасна хадзiць на станцыю метро "Фрунзенская" не па алейках нашага сквера, а па "штучным ландшафце", "другiм паверсе", "другой зямлi", праз "крыты скразны праход". Запэўнiваю, нам яшчэ не надакучыла хадзiць па зямлi, створанай Богам, а не чыноўнiкамi".

"Мы вельмi ўдзячныя вам за аб’ектыўную ўвагу да праблемы, якая ўжо 6 месяцаў грукоча экскаватарамi i дае ведаць аб сабе клубамi пылу ў нас пад вокнамi. Праблема гэта — будаўнiцтва бiзнэс-цэнтра, бачыцца нам сур’ёзнайi вартай грунтоўнага абмеркавання.

З адказу намеснiка старшынi Мiнгарвыканкама са здзiўленнем даведалiся, што СААТ "Iтэрабелбуд" выбрала зямельны ўчастак у сакавiку 2004 года i атрымала дазвол на правядзенне там праектна-пошукавых работ у вераснi таго ж года. Такiм чынам, больш як 4 гады таму Мiнгарвыканкам зацвердзiў будаўнiцтва першых у сталiцы хмарачосаў, якiя, згодна з адказам "Звяздзе" спадара Ладуцькi, зробяць больш "багатым сiлуэт цэнтральнай часткi горада i змогуць завяршыць горадабудаўнiчую перспектыву". I ўсе гэтыя 4 гады аб такiм грандыёзным будаўнiцтве, аб стварэннi новых контураў горада, якiя разам з будынкамi Прывакзальнай плошчы i абелiскам Перамогi гатовыя стаць яго сiмваламi (цi замест iх), няма шырокай iнфармацыi. I толькi пасля сабранага ў экстранным парадку сходу жыхароў дамоў №№ 4, 6, 10, 30, 36 па вулiцы Максiма Танка для "грамадскага абмеркавання праекта", перспектывы будаўнiцтва бiзнэс-цэнтра трохi праяснiлiся. Аказалася, на тэрыторыi, супастаўнай з плошчай сярэдняга памеру стадыёна, будуць узведзены гiганцкiя аб’екты. У гадзiны пiк тут будзе велiзарнае стоўпатварэнне.