Павышаюцца некаторыя віды пенсiй i дапамог

Источник материала:

Адначасова са змяненнем бюджэту пражытковага мiнiмуму павысяцца памеры дзiцячых дапамог. У прыватнасцi, паводле слоў намеснiка начальнiка галоўнага ўпраўлення палiтыкi занятасцi i народанасельнiцтва Мiнiстэрства працы i сацыяльнай абароны Таццяны Шэметавец, цяпер аднаразовая дапамога пры нараджэннi першага дзiцяцi складае 1 млн 123,5 тыс., аднаразовая дапамога пры нараджэннi другога i наступных дзяцей — 1 млн 572,9 тыс., аднаразовая дапамога мацi, якая стала на ўлiк у жаночай кансультацыi да 12-тыднёвага тэрмiну цяжарнасцi, — 224,7 тыс. рублёў. Пры гэтым памер штомесячных дапамог на дзяцей ва ўзросце больш за 3 гады (варта заўважыць, што гэта дапамога прадастаўляецца з улiкам сукупнага даходу бацькоў) вызначана ў 67 410 руб., а штомесячная дапамога на дзяцей ва ўзросце да 3 гадоў — 179 760 рублёў. Плюс да таго, таксама ў сувязi са змяненнем бюджэту пражытковага мiнiмуму, з 1 жнiўня пачнецца iндэксацыя мiнiмальных i сацыяльных пенсiй, а таксама надбавак i павышэнняў да iх. Да прыкладу, як паведамiла карэспандэнту "Звязды" начальнiк галоўнага ўпраўлення пенсiйнага забеспячэння i сацыяльнага страхавання мiнiстэрства Валянцiна Каралёва, мiнiмальная пенсiя па ўзросце пры стажы 20 гадоў у жанчын або 25 гадоў у мужчын складзе 171,8 тыс. рублёў.