Гэтыя выхадныя будуць дажджлівыя

Источник материала:

Атмасферны фронт, якi перамяшчаецца на тэрыторыю Беларусi з Заходняй Еўропы, у суботу, 9 жнiўня, пагоршыць умовы надвор’я ў краiне, паведамiла карэспандэнту БЕЛТА галоўны сiноптык Рэспублiканскага гiдраметэацэнтра Вольга Фядотава.

Паводле слоў спецыялiста, у ноч на 9 жнiўня па заходняй палавiне рэспублiкi, а ўдзень на большай яе частцы чакаюцца дажджы, месцамi з навальнiцамi. У дзённыя гадзiны ў асобных раёнах прагназуюцца моцныя дажджы. Магчымы град. Пры навальнiцах чакаецца ўзмацненне ветру да 15—20 метраў у секунду. Пры гэтым тэмпература паветра ў ноч на суботу, 9 жнiўня, будзе вагацца ад 11 градусаў цяпла на ўсходзе краiны да 19 градусаў вышэй за нуль на захадзе. Дзённая тэмпература складзе 20—26 градусаў цяпла. У Гомельскай i Магiлёўскай абласцях чакаецца да плюс 29 градусаў.

У ноч на нядзелю, 10 жнiўня, у Беларусi будзе яшчэ дажджлiва. У асобных раёнах Вiцебскай i Мiнскай абласцей пройдуць моцныя дажджы, месцамi з навальнiцамi. Пры навальнiцах моцны вецер.

Днём у нядзелю дажджоў будзе менш. Яны пройдуць толькi месцамi i будуць мець кароткатэрмiновы характар. Паводле слоў спецыялiста, дажджы чакаюцца пераважна ва ўсходнiх раёнах рэспублiкi. Тэмпература паветра ў ноч на нядзелю складзе 12—17 градусаў цяпла. Удзень яна падымецца да 19—25 градусаў.

У далейшым на тэрыторыю Беларусi зноў пачне паступаць больш цёплае паветра з поўдня Еўропы. У панядзелак, 11 жнiўня, у рэспублiцы ўсталюецца надвор’е пераважна без ападкаў. Толькi ноччу ў панядзелак у паўночна-заходнiх раёнах, а ўдзень на паўднёвым усходзе магчымы невялiкiя дажджы. У дзённыя гадзiны паветра прагрэецца да 22—27 градусаў.

Да сярэдзiны тыдня будзе горача. Дзённая тэмпература павысiцца да 26—31 градуса цяпла.  Чакаецца пераважна без ападкаў.

БЕЛТА.