Пах чабаровы

Источник материала:

У песнях застанёмся мы

Песні Уладзiмiра Буднiка адметныя вытанчанай меладыйнасцю, нацыянальным каларытам. Выхаванец палескага краю, ён ярка ўвасобiў прыродную духоўнасць у вакальных i iнструментальных творах. Сiмфанiчная паэма "Сказ пра Палессе", п’еса "Успамiны", песнi "Папараць-кветка", "Палессе", "Белая лiлея", "Зялёная пушча", "На мяжы раставанняў i сустрэч", "Шумi, мой лес", "Мацi-зямлi" i iншыя перадаюць непаўторнае хараство нашай зямлi, духоўную несупакоенасць яе насельнiкаў. Уладзiмiр Буднiк — аўтар шэрагу патрыятычных песняў. Вакальны твор "Янка Купала" меў поспех i на еўрапейскiх фестывалях. Каля паўтара дзесятка песень, створаных кампазiтарам сумесна з вядомымi паэтамi, змясцiла "Звязда".

Песню "Пах чабаровы" Уладзiмiр Буднiк напiсаў для папулярнага ў мiнулыя дзесяцiгоддзi эстраднага ансамбля "Чараўнiцы". Даверлiвасць iнтанацыi, цеплыня i пачуццёвая непасрэднасць твора прыцягваюць увагу i сучасных выканаўцаў.

Мiхась ШАВЫРКIН.

Музыка Уладзiмiра Буднiка         Верш Кастуся Кiрэенкi

Не прыдумала сама,

Што са мной здарылася:

З працы сёння йшла дамоў

I з дарогi збiлася.

Мне б iсцi каля ракi, —

Я ж пайшла дубровай,

Галаву маю кружыў

Пах чабаровы.

  Прыпеў:

Я iшла ўсё ды iшла,

Аж пакуль стамiлася,

i не ведаю сама,

Як з Iгнасем стрэлася.

А Iгнась жа — ён са мной

Ды такi суровы...

Не кружы мне галавы,

Пах чабаровы!

Хлопец глянуў на мяне —

Я аж здрыганулася.

Але што са мной? Чаму

Да яго схiнулася.

I чаму так мiлы мне

Прывiтання словы?

Кружыць, кружыць галаву

Пах чабаровы!

  Прыпеў.

Неба ззяла над зямлёй

Яркай вечарнiцаю.

Доўга мы сядзелi з iм,

З любым, над крынiцаю.

Толькi цiхiя дубы

Чулi нашы змовы...

Ой, вясна мая, вясна,

Пах чабаровы...

  Прыпеў.

Што скажу матулi я,

Як часiнай позняю

Я з’яўлюся перад ёй,

Ласкавай i грознаю.

Што скажу, схаваю як

Водар той дубровы?

Аж у хату прынясла

Пах чабаровы...

  Прыпеў.