Колькі гадоў у сапраўднасцi?

Источник материала:

Iнфарм-укол

Неабходна адрознiваць храналагiчны ўзрост ад бiялагiчнага. Бiялагiчны не паказвае працягласцi жыцця, а толькi iнфармуе аб тым, як арганiзм вытрымлiвае жыццёвыя праграмы, закладзеныя ў iм генетычна. Праверым сябе.

Узрост скуры можна вызначыць так: вялiкiм i ўказальным пальцамi вазьмiце скуру на тыльным баку далонi i адцягнiце яе на 5 секунд. Калi сляды зашчамлення знiкнуць за пяць цi меней секунд, то бiялагiчны ўзрост вашай скуры не перавышае 45 гадоў, за 6—15 — 60 гадоў, за 16—55 — 70. Узрост вачэй. Прачытайце газетны тэкст на максiмальна блiзкай ад вачэй адлегласцi i памерайце яе лiнейкай. Ва ўзросце 21 года пры адсутнасцi паталогii зроку чалавек можа чытаць газету на адлегласцi 10 см ад вачэй, у 34 гады — 14 см, а да 60 гадоў гэта адлегласць павялiчваецца да метра. Хуткасць рэакцыi правяраем так: станьце, выцягнiце руку наперад, пальцы прамыя, далонi ўнутр. Партнёр размяшчае 40-сантыметровую лiнейку паралельна вашай далонi на адлегласцi 1-2 см, нулявая адзнака знаходзiцца на ўзроўнi нiжняга краю далонi. Па камандзе "ўвага" партнёр на працягу 5 секунд павiнен апусцiць лiнейку. Ваша задача як мага хутчэй сцiснуць пальцы ў кулак i затрымаць падзенне лiнейкi. Бiялагiчны ўзрост вызначаецца па месцы перахвату лiнейкi. Паказчык 12 см адпавядае ўзросту 20 гадоў, паказчык 25 см — 60. Раўнавага (работа вестыбулярнага апарата). Стойце як мага даўжэй басанож на адной назе, рукi ў бакi, вочы заплюшчаны. Калi вы прастаiце звыш 30 секунд, ваш арганiзм яшчэ малады, а калi менш за 5 секунд, значыць, пасталеў.

Памятайце, што эмацыянальны фон i фiзiчны стан цесна звязаныя. Чалавек актыўны, бадзёры i жыццярадасны даўжэй захоўвае добрую фiзiчную форму. Песiмiст, якi пастаянна скардзiцца, можа прымусiць свой арганiзм пасталець заўчасна. Станоўчыя эмоцыi спрыяльна ўздзейнiчаюць на нервовую сiстэму, а, значыць, i на арганiзм у цэлым.

Вядучая рубрыкi Святлана БАРЫСЕНКА.