Абзац

26.08.2009 10:28 — |

Размер текста:: A; A; A

Источник материала:

Абзац

* Колькасць вакансiй у Мiнску ў 6,6 раза перавышае лiк беспрацоўных. На 1 жнiўня ў сталiцы налiчвалася 23,6 тыс. свабодных месцаў, з iх 19 — па рабочых спецыяльнасцях. Найбольш запатрабаваныя ў Мiнску рабочыя будаўнiчых прафесiй, вадзiцелi аўтамабiляў, зваршчыкi, электрыкi, слесары, мантажнiкi, токары, кухары, прадаўцы прадуктовых тавараў, прыбiральшчыкi i г.д. Цяжэй за ўсё знайсцi працу эканамiстам, юрыстам, тэхнолагам, механiкам, выкладчыкам некаторых дысцыплiн.

* У вынiку ДТЗ у Клецкiм раёне загiнулi трое чалавек. Вадзiцель i пасажыр мiкрааўтобуса, якi сутыкнуўся з аўтамабiлем "Урал", загiнулi на месцы, трое пасажыраў дастаўленыя ў бальнiцу, з якiх жанчына пенсiйнага ўзросту памерла.

* У Мiнску падчас заключнага канцэрта Іркуцкага музычнага тэатра памёр заслужаны артыст Расii Вячаслаў Дычынскi. Тэатр знаходзiцца тут на гастролях. Да свайго 65-годдзя артыст не дажыў некалькi месяцаў. Смерцi папярэднiчалi два iнфаркты, перанесеныя раней.

* Беларусь увяла на тры гады антыдэмпiнгавую пошлiну на ўкраiнскую карамель. Такое рашэнне змяшчаецца ў пастанове Савета Мiнiстраў Беларусi № 1178.

* Супрацоўнiкi Гродзенскага РАУС выявiлi i знiшчылi самагонны мiнi-завод ў лесе каля вёскi Азёры Гродзенскага раёна. Знiшчана 100 л самагону, 1,5 тыс. л брагi, а таксама абсталяванне. Парушальнiкам пагражае штраф, у т.л. i за нанясенне страты навакольнаму асяроддзю — высечку дрэваў на дровы, выпаленую брагай зямлю.

* Залатыя алiмпiйскiя медалi з улiкам матэрыялаў, з якiх выраблены, каштуюць крыху больш $216, пiша MаrkеtWаtсh. Яны амаль цалкам складаюцца з серабра i ўтрымлiваюць усяго 6 грамаў золата, неабходнага для яго пакрыцця.

Поўны абзац

* У канадскiм горадзе Таронта 23-гадовая жанчына зайшла ў рэйсавы аўтобус з малатком i некалькi разоў ударыла iм вадзiцеля. Яна абвiнавацiла вадзiцеля ў тым, што ён не спынiўся на прыпынку, калi яна стаяла там. Пашкоджаннi атрымалi яшчэ два чалавекi. Ёй прад’яўлены абвiнавачваннi ва ўзброеным нападзе.

* Адзiн з галандскiх начных клубаў зоймецца вытворчасцю электраэнергii за кошт людзей, якiя танцуюць. Распрацавана спецыяльнае пакрыццё для падлогi, што складаецца са спружын i магнiтаў, якiя дапамагаюць перапрацоўваць цiск ног наведвальнiкаў у электраэнергiю. Як лiчаць вучоныя, з дапамогай клiентаў можна будзе вырабляць не менш за трэць электраэнергii, якая спажываецца.

* У iтальянскiм горадзе Эбалi гарадскiя ўлады прынялi закон, згодна з якiм закаханыя, што праяўляюць свае палкiя жарсцi ў машыне, атрымаюць штраф да 500 еўра. Закон уступае ў сiлу, калi аўтамабiль прыпаркаваны ў публiчным месцы. Гэта — не адзiны незвычайны закон, якi прыняты ў Iталii гэтым летам. Паблiзу Венецыi нельга будаваць пясчаныя палацы, на марскiм курорце Фортэ дэй Мармi катэгарычна забараняецца стрыгчы газоны па выхадных. Улады Лукi забаранiлi кармiць галубоў у цэнтры горада, а жыхары i госцi Навары не могуць збiрацца па начах у парках кампанiямi больш за два чалавекi.

* 26-гадовы жыхар Валожына, па словах яго 23-гадовай жонкi, спрабаваў згвалцiць яе на вулiцы ў цэнтры горада, а таксама пабiў. Аб гэтым жанчына расказала ў сваёй заяве ў раённую пракуратуру. Паводле папярэдняй iнфармацыi, iнцыдэнт адбыўся пасля таго, як муж нечакана ўбачыў сваю жонку на дыскатэцы.

* Таджыкскi баксёр Дзахон Курбанаў, якi выступае ў вагавай катэгорыi да 81 кг, укусiў за плячо казаха падчас бою. Iнцыдэнт адбыўся напрыканцы трэцяга раўнда. Рэферы дысквалiфiкаваў баксёра. Да моманту спынення паядынка казахстанскi спартсмен вёў па ачках з лiкам 12:6. Асаблiвую пiкантнасць выпадку надало тое, што на боi прысутнiчаў былы чэмпiён свету па прафесiйным боксе Эвандзер Холiфiлд. Менавiта ён у 1997 годзе паспытаў на сабе ўсю магутнасць скiвiц Майка Тайсана, якi падчас бою адкусiў апаненту кавалак вуха.

Паводле паведамленняў карэспандэнтаў "Звязды" і інфармагенцтваў.