Атручэнне на сметнiку

Источник материала:

Пяць чалавек у Бабруйскiм раёне памерлi ад атручэння невядомай, верагодна — алкагольнай, вадкасцю.

20 жнiўня блiжэй да ночы на палiгоне бытавых адходаў паблiзу вёскi Бабiна Бабруйскага раёна знайшлi ў стане непрытомнасцi трох мужчын i дзвюх жанчын. Усе яны — жыхары Бабруйска i навакольных вёсак, беспрацоў-ныя. Узрост — ад  24 да 48 гадоў.

Побач з iмi была знойдзена 5-лiтровая пластыкавая канiстра з рэштамi невядомай вадкасцi. Магчыма, кампанiя пiла нейкi алкагольны сурагат.

Брыгада "хуткай дапамогi" даставiла атручаных у бабруйскую бальнiцу. Аднак выратаваць iх не ўдалося — усе пяць чалавек на наступны дзень памерлi, не прыходзячы ў прытомнасць.

На гэтым тыднi "Звязда" паведамляла аб падобным выпадку ў Бялынiцкiм раёне. Там людзi, якiя атруцiлiся, выжылi. Нагадаем, што 18 жнiўня з вёскi Буднiкi былi дастаўлены ў раённую бальнiцу тры мужчыны. Як высветлiлася, прама на вулiцы яны знайшлi пластыкавую бутэльку з невядомай вадкасцю, якая па колеры i паху нагадала мужчынам алкагольны напой. Яны выпiлi па 50 грамаў, адчулi сябе дрэнна i самi пабеглi да медыкаў. Праз суткi пацыентаў выпiсалi з бальнiцы. Урачы мяркуюць, што вяскоўцы атруцiлiся тармазной вадкасцю.

Алена Казлова.