Добрыя хлопцы і зайздросныя халасцякi Багдановiчы

Источник материала:

Пасёлак Ялiзава, малая радзiма новых алiмпiйскiх чэмпiёнаў, святкуе "золата" весляроў.

Мацi Аляксандра i Андрэя Багдановiчаў Людмiла Альбiнаўна глядзела трансляцыю з Пенкiна, перажывала i нават плакала.

— Так хацелася, каб мае хлопчыкi перамаглi! — не хавае яна пачуццяў. — Я амаль штодня тэлефанавала iм у Пекiн i заклiкала iмкнуцца i трымацца. Казала, што ўсё Ялiзава за iх хварэе!

Сям’я Багдановiчаў жыве ў пасёлку Ялiзава, што ў Асiповiцкiм раёне. Бацькi чэмпiёнаў працуюць на мясцовым шклозаводзе. Людмiла Альбiнаўна — начальнiк участка, Вiктар Іванавiч — фармоўшчык.

Аляксандр стаў займацца спортам з 13 гадоў. У веславанне яго пацягнуў зямляк, якi займаўся гэтым вiдам спорту i адчуў, што ў хлопца павiнна атрымацца. Так i адбылося: у Бабруйску Аляксандр стаў паказваць добрыя вынiкi.

Далей старэйшы брат загiтаваў малодшага, i ўрэшце iх паставiлi ў пару. Бацькi не перашкаджалi сынам пайсцi ў вялiкi спорт, тым больш што сама Людмiла Альбiнаўна — спартсменка-аматарка, займалася валейболам.

Цяпер браты Багдановiчы жывуць у Бабруйску, i пакуль 26-гадовы Аляксандр i 22-гадовы Андрэй — зайздросныя халасцякi. Мацi адкрыла сакрэт, што ў старэйшага сына ёсць дзяўчына, таму, можа, i вяселле не за гарамi. Пакуль жа Людмiла Альбiнаўна з мужам рыхтуюцца да прыезду ў бацькоўскi дом залатых чэмпiёнаў i шпарка робяць рамонт у кватэры.

Адразу пасля пераможнага выступлення братоў у гэтай кватэры сабралася шмат народу: сваякi, сябры, суседзi. Зразумела, тэлефанаваннi без перапынку: з алiмпiйскай перамогай вiншуюць усе знаёмыя ялiзаўцы, журналiсты, прадстаўнiкi ўлады.

— Калi шчыра, то я спадзявалася на медалi, — гаворыць мацi. — Праўда, наконт "золата"... Вельмi ўжо сур’ёзныя ў iх былi сапернiкi. Але атрымалася! Што далей зменiцца ў жыццi сыноў? Будуць працаваць i далей працягваць радаваць Беларусь сваiмi перамогамi. Я iх толькi заўсёды папярэджваю, каб не закружылiся iх галовы ад поспехаў i не напаткала "зорная" хвароба. Але яны, добрыя хлопцы i працаўнiкi з самага дзяцiнства, адолеюць усё. Мы вiншуем iх з перамогай!

— Так, увесь пасёлак вiншуе бацькоў Багдановiчаў! — пацвердзiў старшыня Ялiзаўскага пасялковага Савета Рыгор Александровiч. — I мы iм рукi пацiснем. Параiмся з кiраўнiцтвам шклозавода, як адзначыць такую падзею. Але пачакайце яшчэ: сёння будзем хварэць за Багдановiчаў на 500-мятроўцы. Павiнны нашы выступiць дастойна!

Iлона Iванова.