Партыйнае прадстаўніцтва на сёлетнiх выбарах зменшылася ўтрая

Источник материала:

28 жнiўня завяршылася рэгiстрацыя кандыдатаў у дэпутаты Палаты прадстаўнiкоў Нацыянальнага сходу Рэспублiкi Беларусь. Учора ў Цэнтральнай выбарчай камiсii паведамiлi, што 276 кандыдатаў ужо зарэгiстравана. З iх 119 вылучаны шляхам збору подпiсаў, 96 — двума спосабамi: грамадзянамi i працоўнымi калектывамi, 20 — грамадзянамi i партыямi, 4 — грамадзянамi, партыямi i працоўнымi калектывамi, 11 — працоўнымi калектывамi i 26 — палiтычнымi партыямi. Пяцёра знялi свае кандыдатуры (трое з iх — сённяшнiя дэпутаты Сяргей Касцян, Анатоль Красуцкi i Мiкалай Чурсiн).

— Гэтыя лiчбы не з’яўляюцца канчатковымi, — паведамiла ўчора на прэс-канферэнцыi старшыня Цэнтральнай камiсii Рэспублiкi Беларусь па выбарах i правядзеннi рэспублiканскiх рэферэндумаў Лiдзiя ЯРМОШЫНА. — Цяпер незарэгiстраваныя кандыдаты падаюць заявы з абскарджаннем адмовы ў рэгiстрацыi ў Цэнтральную камiсiю. На ранiцу 29 жнiўня было пададзена 9 такiх заяў. ЦВК плануе пачаць iх разгляд 3 верасня i завяршыць да канца тыдня.

Сярод партыйцаў па пяць чалавек было адмоўлена членам Партыi БНФ i Партыi камунiстаў Беларускай. Чатырох кандыдатаў падчас рэгiстрацыi згубiла Камунiстычная партыя Беларусi, трох — Аб’яднаная грамадзянская партыя, аднаго — Лiберальна-дэмакратычная, двух — Рэспублiканская партыя працы i справядлiвасцi, трох — Беларуская сацыял-дэмакратычная партыя (Грамада).

Ужо цяпер можна сказаць, што ў большасцi выпадкаў прычынай адмовы стала недастатковае веданне прэтэндэнтамi заканадаўства Рэспублiкi Беларусь. Няправiльна запоўненыя падпiсныя лiсты i дэкларацыi аб даходах прывялi да выбыцця з дыстанцыi значнай колькасцi кандыдатаў. Так, напрыклад, выбракоўвалiся лiсты, на якiх стаялi подпiсы грамадзян, якiя пражывалi ў розных адмiнiстрацыйных раёнах, альбо якiя былi засведчаны адмiнiстрацыяй з iншага раёна.

— Сёлетняя выбарчая кампанiя характарызуецца тым, што ўтрая зменшылася партыйнае прадстаўнiцтва, у параўнаннi з 2004 годам, 118 супраць 316, — звярнула ўвагу Лiдзiя Ярмошына. — Значна, у два з паловай раза, скарацiлася вылучэнне ад працоўных калектываў. Гэта форма вылучэння сёння ўсё менш запатрабаваная. Разам з тым расце папулярнасць вылучэння шляхам збору подпiсаў. У 2004 годзе ўдзельная вага такiх кандыдатаў складала 55 працэнтаў, сёлета — 89 працэнтаў.

— Многiя кандыдаты скардзiлiся на тое, што сёння цяжка становiцца сабраць тысячу подпiсаў, — сказала Лiдзiя Ярмошына. — Як выйсце, я хацела б прывесцi спосаб збору подпiсаў графам Прушынскiм, якi, на жаль, занадта позна ўступiў у выбарчую кампанiю, 15 жнiўня, i яму проста не хапiла часу, каб з поспехам завяршыць сваё вылучэнне. Тым не менш спадар Прушынскi, стоячы на прахадной прадпрыемства ў Ваўкавыску, за адну гадзiну сабраў 150 подпiсаў.

У сёлетнюю выбарчую кампанiю ўпершыню быў зарэгiстраваны ваеннаслужачы, якi адбывае тэрмiновую вайсковую службу. На ўвесь час перадвыбарнай агiтацыi яму прадастаўлены адпачынак.

На сёння па акрэдытацыю звярнулiся 141 мiжнародны назіральнiк. З iх 63 прадстаўляюць Выканкам СНД, 21 — Мiжпарламенцкую Асамблею СНД, 57 — БДIПЧ АБСЕ. Акрамя таго, на запрашэнне ЦВК Беларусi адгукнулiся цэнтрвыбаркамы iншых краiн: Расiйскай Фэдэрацыi, Украiны, Арменii i Кiргiзii.

— Мы беспраблемна i ў поўнай згодзе працуем з мiсiяй АБСЕ, — падкрэслiла старшыня ЦВК. — Штотыднёва сустракаемся з усiмi прадстаўнiкамi мiсiй i вырашаем пытаннi, якiя ўзнiкаюць у ходзе iх працы.

Вольга МЯДЗВЕДЗЕВА.