Калі размеркаванне не спадабаецца

Источник материала:

Артыкулам 10 Закона Рэспублiкi Беларусь "Аб адукацыi" ўстаноўлена, што выпускнiкi ўстаноў адукацыi, якiя атрымалi прафесiйна-тэхнiчную, сярэднюю спецыяльную або вышэйшую адукацыю ў дзённай форме атрымання адукацыi за кошт сродкаў рэспублiканскага i (або) мясцовых бюджэтаў, накiраваныя на работу па размеркаваннi, лiчацца маладымi рабочымi (служачымi), маладымi спецыялiстамi i абавязаны адпрацаваць па размеркаваннi адзiн год — пасля атрымання прафесiйна-тэхнiчнай адукацыi, два гады — пасля атрымання сярэдняй спецыяльнай або вышэйшай адукацыi. Указаны тэрмiн работы адлiчваецца з дня заключэння працоўнага дагавора памiж маладым рабочым (служачым), маладым спецыялiстам i наймальнiкам.

Малады рабочы (служачы), малады спецыялiст, якi не адпрацаваў вышэйназваны тэрмiн работы па размеркаваннi, абавязаны вярнуць сродкi, затрачаныя на яго падрыхтоўку з рэспублiканскага i (або) мясцовых бюджэтаў, у адпаведны бюджэт.

Палажэннем аб вяртаннi сродкаў у рэспублiканскi i (або) мясцовыя бюджэты, затрачаных дзяржавай на падрыхтоўку рабочага (служачага), спецыялiста, якое зацверджана пастановай Савета Мiнiстраў Рэспублiкi Беларусь ад 23.09.2006 г. № 1255, прадугледжаны выпадкi, калi маладыя спецыялiсты вызваляюцца ад вяртання затрачаных на iх навучанне дзяржаўных сродкаў (пункт 4).

У прыватнасцi, вызваляюцца ад вяртання сродкаў дзецi-сiроты, дзецi, якiя засталiся без апекi бацькоў, асобы з лiку дзяцей-сiрот, дзяцей, якiя засталiся без апекi бацькоў, а таксама асобы ва ўзросце ад 18 да 23 гадоў, якiя страцiлi апошняга з бацькоў у перыяд навучання.

Вышэйназваным Палажэннем устаноўлена, што ў выпадку непрыбыцця маладых спецыялiстаў на месца працы, iх звальнення або пераводу да заканчэння тэрмiну работы па размеркаваннi наймальнiк i (або) малады спецыялiст у трохдзённы тэрмiн павiнны паведамiць аб гэтым ва ўстанову адукацыi, якая выдала маладому спецыялiсту накiраванне на работу, з указаннем прычын i прыкладаннем завераных ва ўстаноўленым парадку копiй неабходных дакументаў, у тым лiку тых, якiя пацвярджаюць iх права на вызваленне ад вяртання затрачаных сродкаў. Для асобаў, пералiчаных у папярэднiм абзацы, ва ўстанову адукацыi неабходна прадставiць наступныя дакументы: заяву з указаннем падстаў вызвалення ад вяртання сродкаў, пашпарт, копiю дакумента аб адукацыi, выпiску з працоўнай кнiжкi (пры яе наяўнасцi), копiю адзiнага бiлета (для дзяцей-сiрот i дзяцей, якiя засталiся без апекi бацькоў, а таксама для асобаў з лiку дзяцей-сiрот, дзяцей, якiя засталiся без апекi бацькоў), копiю пасведчання аб смерцi апошняга з бацькоў (для асобаў ва ўзросце ад 18 да 23 гадоў, якiя страцiлi апошняга з бацькоў у перыяд навучання).

Установа адукацыi пасля прыняцця рашэння аб вызваленнi маладога спецыялiста ад вяртання затрачаных сродкаў выдае яму даведку аб самастойным працаўладкаваннi.