Стартуем у Львове

Источник материала:

Сёння нацыянальная футбольная зборная стартуе ў адборачным цыкле ЧС-2010 у ПАР. Першы матч беларусы правядуць у Львове, дзе давядзецца сапернiчаць з украiнскiмi гульцамi. З "жоўта-блакiтнымi" беларусы ўжо гулялi ў адной групе ў адборы да ЧС-2002. Тады ў Кiеве лiк нават не быў адкрыты, а ў Мiнску наймацнейшымi аказалiся госцi — 2:0. Сёння ж у групе 6 адбудуцца яшчэ два матчы: у Барселоне андорцы прымуць англiчан, а ў Загрэбе харваты — казахстанцаў. Усе еўрапейскiя ўдзельнiкi чэмпiянату свету вызначацца восенню наступнага года. Напрамую ў фiнальную стадыю выходзяць лепшыя зборныя дзевяцi адборачных груп, а яшчэ чатыры пропускi здабудуць пераможцы матчаў плэй-оф, дзе згуляюць каманды, якiя зоймуць другiя месцы.

Першыя пуцёўкi ў 1/8 фiналу Кубка Беларусi заваявалi футбалiсты вышэйшай лiгi. Раней за астатнiя клубы ў гэту стадыю розыгрышу прабiлiся мiкашэвiцкi "Гранiт", мiнскi МТЗ-РІПА, гродзенскi "Нёман" i сталiчны "Лакаматыў". У другi турнiрны дзень (4 верасня) у гульнях 1/16 розыгрышу з прадстаўнiкоў элiты цяжкасцi адчуў на сабе толькi салiгорскi "Шахцёр". Асноўны час гарнякi завяршылi ўнiчыю (2:2), прычым камандзе Юрыя Вяргейчыка давялося адыгрывацца. I ўсё ж "Асiповiчы" не здолелi выйграць у "Шахцёра" на родным полi — 2:4. У Рэчыцы "Смаргонь" перамагла мясцовы "Ведрыч-97" — 1:0, а ў Нясвiжы наваполацкi "Нафтан" засмуцiў "Верас" — 2:0.

Кiраўнiцтва ўкраiнскага клуба вышэйшай лiгi "Iльiчавец" (Марыупаль) звольнiла Аляксандра Iшчанку з пасады галоўнага трэнера. Выконваць яго абавязкi будзе Iлья Блiзнюк. Сярод яго падапечных i тры беларускiя футбалiсты — нападаючы Павел Бяганскi, паўабаронца Мiкалай Кашэўскi i абаронца Павел Кiрыльчык. Развiталася са сваiм настаўнiкам беларусам Мiраславам Рамашчанкам i расiйская каманда "Том". Новым рулявым назначаны Васiль Баскакаў.

Днямi сталi вядомыя сапернiкi нашай краiны ў своеасаблiвым спаборнiцтве на права прыняць чэмпiянат свету па хакеi з шайбай 2014 года. Жаданне правесцi гэты лядовы форум таксама выказалi Чэхiя, Венгрыя, Латвiя i Украiна. Хто ж акажацца гаспадаром турнiру, даведаемся ў маi 2009 года. Рашэнне будзе прынятае на наступным кангрэсе Мiжнароднай федэрацыi хакея ў швейцарскiм Берне. Нагадаем, што ў 2009-м чэмпiянат свету пройдзе ў Швейцарыi, у 2010-м — у Германii, у 2011-м — у Славакii, у 2012-м — у Фiнляндыi, у 2013-м — у Швецыi.