Карэспандэнт высвятляў сітуацыю... Навошта печ у... кватэрах?

Источник материала:

— Калi зiмой у кватэрах плюс 18, — гэта для нас вельмi добра, — канстатавалi настаўнiцы школы пасёлка Копцi, што ў Вiцебскiм раёне, з якiмi пагаварыў карэспандэнт "Звязды". — А так... Прывыклi да плюс 15, часта бывае менш.

— А мой сын, каб сагрэцца, печ пабудаваў у кватэры. І добра было ягонай сям’i, пакуль не прыйшлi з праверкай ды не прыгразiлi штрафам, — эмацыянальна гаворыць яшчэ адна мясцовая жыхарка. — А што рабiць, калi холадна? А мы ж у аграгарадку жывём! I адкрыўся ён афiцыйна не сёлета, а значна раней.

I насамрэч пасля размовы з ёй, калi я хадзiў па пасёлку, убачыў некалькi пячных труб на дахах. Вiдаць, да ўсiх уладальнiкаў печаў праверка яшчэ не дабралася?

Тутэйшыя людзi яшчэ вераць у тое, што, калi адкрыюць новую кацельню, сiтуацыя палепшыцца. Але гэта зацягваецца — да такiх высноў прыйшлi спецыялiсты Камiтэта дзяржаўнага кантролю Вiцебскай вобласцi. Больш за тое, па iх даных толькi леташняй зiмой на цеплатрасе ў гэтым населеным пункце было 7 буйных аварый.

— Бывала, увесь дзень сядзелi без цяпла, — успамінае бабуля, — I неаднаразова такое было.

Вiцебскаму аблвыканкаму пры падрыхтоўцы да чарговых ацяпляльных сезонаў 2008—2009 гадоў Урадам краiны было даручана прыняць меры па аптымiзацыi цеплазабеспячэння Копцяў. Для гэтага неабходна размясцiць новую кацельню на цэнтральным цеплавым пункце. Пакуль што цяпло можна падаць у жылыя дамы, школу, ФАП i г.д. са старой кацельнi.

Начальнiк вытворча-тэхнiчнага аддзела арганiзацыi раённай камунальнай гаспадаркi Валянцiн Цiмашэнка ўпэўнены, што, як i запланавана, да навагоднiх святаў увядуць у эксплуатацыю новую кацельню.

— Проста нам пералiчылi неабходныя грошы толькi напрыканцы жнiўня. Зразумела, кантралёры проста так не абвiнавачваюць. Але... Ёсць пэўныя нюансы, — гаворыць начальнiк. — 7 аварый? Ну не без адключэнняў цяпла было. Цеплатрасу працягласцю ў 900 метраў, калi не памыляюся, у 1970-х праклалi. А мо i раней. Адпаведна, вялiкiя страты цяпла былi. Абсталяванне новае на будучай кацельнi айчыннай вытворчасцi. Падлiчылi, што акупiцца яно менш чым праз тры гады. Старую разбураць не будзем, няхай застаецца ў рэзерве. Галоўнае, каб людзi былi ў вынiку задаволены.

Безумоўна, сiтуацыя ў аграгарадку з цеплазабеспячэннем няпростая. Мае суразмоўцы з тутэйшых скардзiлiся, што пiсалi лiсты па праблеме ў розныя рэспублiканскiя iнстанцыi. А цi справа кiраўнiцтва дзяржавы займацца такiмi рэчамi? Чаму на месцы не разабралiся адказныя асобы райвыканкама, аблвыканкама? Тыя ж грошы маглi б камунальнiкам перавесцi i вясной. Па даных Камiтэта дзяржкантролю, 450 мiльёнаў рублёў, што былi выдзелены з абласнога бюджэту, i цяпер не асвоеныя. Да новай кацельнi яшчэ трэба падвесцi прыродны газ. Як высветлiлi кантралёры, катлы для нагрэву вады патрабуюць поўнай камплектацыi — без спецыяльных газавых прыстасаванняў працаваць не змогуць. А час iдзе...