Завод на паперы

Источник материала:

Прадпрыемства, якому б працаваць ужо, iснуе пакуль у праектна-каштарыснай дакументацыi

Нягледзячы на тэндэнцыю па павелiчэннi аб’ёмаў вытворчасцi алею ў рэспублiцы, паводле слоў Івана Данчанкi, сённяшнi ўзровень ўсё ж такi не адпавядае патрабаванням i магчымасцям. У прыватнасцi, вытворчыя магутнасцi алейняў да сезона перапрацоўкi насення ўраджаю 2008 года склалi 254 тысячы тон у год пры заданнi 337,1 тысячы тон. Акрамя таго, для нарошчвання магутнасцяў па перапрацоўцы алеенасення прыцягнута толькi каля паловы ад запланаваных iнвестыцый. "Горш за iншых вядзецца работа па прыцягненнi iнвестыцый у Брэсцкай i Гродзенскай абласцях", — заўважыў старшыня канцэрна. I дадаў, што ў Брэсцкай вобласцi наогул ужо на працягу некалькiх гадоў ЗАТ "Брэстаблрапс", якое дабiлася права атрымання дзяржзаказу па рапсу i павiнна пабудаваць у Драгiчыне завод па перапрацоўцы алеенасення рапсу магутнасцю 100 тысяч тон, не выконвае сваiх абяцанняў — далей слоў справа не варушыцца. Напрыклад, сёлета ставiлася задача нарасцiць там магутнасцi да 64 тысяч тон перапрацоўкi, а вынiкаў няшмат: да гэтага часу па заводзе толькi падрыхтавана праектна-каштарысная дакументацыя. Больш за тое, паводле iнфармацыi старшынi Дзяржкантролю Зянона Ломаця, заснавальнiкамi прадпрыемства з’яўляюцца фiзiчныя асобы, якiя атрымалi дзяржзаказ i замест перапрацоўкi рапсу занялiся яго рэалiзацыяй як камерцыйная ўстанова. Мiж iншым, вынiкi праверкi прадпрыемства перададзены ў фiнансавую мiлiцыю. У сваю чаргу, прэм’ер адзначыў, што пры неабходнасцi дакументы павiнны быць накiраваны i ў пракуратуру. I даручыў Брэсцкаму аблвыканкаму за тыдзень адпрацаваць пытанне па будаўнiцтве завода.

Гаворачы пра неабходнасць нарошчвання магутнасцяў па алее- здабычы ў краiне, Iван Данчанка ўнёс i прапановы па карэктыроўцы праграмы развiцця алейна-тлушчавай галiны на 2007—2010 гады. Напрыклад, прапануецца павялiчыць валавы збор насення рапсу да 1 мiльёна тон да 2010 года. Раней, дарэчы, ставiлася задача давесцi яго да 800 тысяч тон. Магутнасцi ж па перапрацоўцы алеенасення плануецца павялiчыць да 1 мiльёна 360 тон: у гэтай справе ў разлiк уключаюцца i дамоўленасцi з расiйскiм акцыянерным таварыствам "Садружнасць". Што датычыцца апошняга, то цяпер з АТ вядуцца актыўныя перамовы па будаўнiцтве ў Лiдскiм раёне прадпрыемства па перапрацоўцы 200 тысяч тон насення рапсу i 200 тон соi.

У канцэрне таксама разлiчваюць на тое, што да 2010 года патрэбы краiны ў бялковай сыравiне ўдасца забяспечыць максiмальна. Пры будаўнiцтве прадпрыемства па перапрацоўцы алеенасення ў Лiдскiм раёне да 2011 года ў Беларусi жывёлагадоўля будзе забяспечана соевым бялком.

Спасылаючыся на меркаванне навукоўцаў, Iван Данчанка паведамiў пра тое, што з мэтай аптымiзацыi спажываемага алею па тлушчакiслотным складзе мэтазгодныя яго наступныя суадносiны: 60 працэнтаў у харчаваннi павiнна прыходзiцца на рапсавы i льняны алей, а 40 працэнтаў — на сланечнiкавы i iншы экзатычны алей. Зыходзячы з гэтага, скарэктаванай праграмай прадугледжаны неабходны мiнiмальны аб’ём iмпарту алею, якi ў рэспублiцы не вырабляецца, а таксама максiмальна магчымае самазабеспячэнне рапсавым алеем. Акрамя таго, ва ўдакладненай праграме прадугледжваецца ўкараненне сучаснага абсталявання па рафiнацыi, вiнтэрызацыi i дэзадарацыi тлушчаў i алею, пашырэнне асартыменту i вытворчасць канкурэнтаздольнай па якасцi прадукцыi.