Штогод новы прыз, альбо Як атрымаць дарагi падарунак ад дзяржавы да дня нараджэння?

Источник материала:

Камбайнер СВК "Купалаўскi" Аршанскага раёна Уладзiмiр Жалязоўскi на леташнiх "Дажынках" атрымаў ад дзяржавы за добрую працу ў падарунак хатнi кiнатэатр. У 2006-м — маразiльнiк. Сёлета за яшчэ лепшыя паказчыкi "свецiць" яму персанальнае аўто. Дарэчы, дзень нараджэння ў камбайнера-перадавiка 21 верасня, у нядзелю. Споўнiцца яму 30 гадоў. Такiм чынам агульнае свята хлебаробаў "Дажынкi" супадае з асабiстым ягоным юбiлеем.

— Не, машыны ў мяне якраз i няма, — кажа Уладзiмiр Мiхайлавiч. — Зразумела, вадзiць умею, я ж камбайнер. Быў у мяне калiсьцi аўтамабiль.

— У чым сакрэт вашай узорнай работы?

— Нiякiх сакрэтаў. Працаваў, як i ўсе. З 5—6 гадзiн ранiцы i да, як кажуць, зорнага неба. У гадзiну ночы дадому вяртаўся. Цяжка, безумоўна, заўсёды ў пачатку. А потым — нiчога, уцягваемся. Хутка прывык да такога рэжыму. У памочнiках сёлета быў мой аднакласнiк Сяргей Жолудзеў. Разам на камбайне "КЗС-10" намалацiлi больш за 1,6 тысячы тон збожжа. Камбайну нашаму тры гады, але функцыянуе добра. А ўсяго ў нас у гаспадарцы больш як дзесяць камбайнаў на жнiве працавалi. Старшыня ў нас добры — Уладзiмiр Кавалёў. На пасадзе ён, калi не памыляюся, трэцi год. З iм прыемна працаваць — чалавек дзелавы.

Жыве наш герой недалёка ад Оршы — у вёсцы Зубава, якая мае статус аграгарадка. А нарадзiўся ў Ляўках. Жыве з жонкай i сынам у доме, што выдзелiла гаспадарка. Трымаюць скацiну — два быкi, двое парасят...

Жонка Святлана працуе ў дзiцячым садку. Сыну Ігару 13 гадоў. Магчыма, хлопец праз некалькi гадоў стане праслаўленым хакеiстам. Не толькi марыць пра гэта, а ўжо шмат чаго зрабiў. У ягонай пакуль што невялiкай спартыўнай бiяграфii ўжо ёсць перамогi — юныя хакеiсты з Зубава блiскуча выступаюць на турнiры "Залатая шайба".

Доўгiх гадоў бацькам працавiтага хлебароба. Бацька працуе вадзiцелем — возiць агранома. Мацi — загадчыца дашкольнай установы. Малодшая сястра камбайнера — медсястра ў райцэнтры.

У вольны час Уладзiмiр любiць хадзiць па грыбы ды ягады. Член БРСМ. Чалавек ён сцiплы i працавiты. Дзякуючы такiм работнiкам i жыве вёска, з кожным годам збiраецца ўсё больш збожжа. Якiя б нi былi разумнымi сучасныя камбайны i iншая тэхнiка, галоўнае, каб былi камбайнеры з вялiкай лiтары.