...

Источник материала:

Кiрмаш "Рыба Беларусi" ўпершыню пройдзе ў Мiнску. Такое мерапрыемства арганiзуецца 20 верасня каля сталiчнага Палаца спорту. 9 буйнейшых рыбаводчых гаспадарак краiны прапануюць мiнчанам увесь асартымент рыбы, што разводзiцца ў нас — ад фарэлi да плотак. Будуць карп, таўсталобiк, белы, і стракаты амур, шчупак, сом, карась, судак, лешч, асяцёр... Рэалiзаваць рыбу прадпрыемствы будуць з мiнiмальнай гандлёвай надбаўкай. Будзе i вэнджаная, вяленая рыба. Не абыдзецца без галоўнай рыбнай стравы — юшкi, пакаштаваць якую змогуць усе ахвотныя.

Мiнгарсавет устанавiў штомесячныя даплаты да акладаў работнiкаў устаноў аховы здароўя, падведамных Мiнгарвыканкаму. У прыватнасцi, урачы i сярэднi медперсанал устаноў аховы здароўя будуць атрымлiваць дадаткова да акладаў 2 базавыя велiчынi. Фармацэўты i правiзары — па 3 базавыя. Даплаты ў памеры 4 базавыя велiчынi ўстаноўлены работнiкам палiклiнiк i урачам скорай медыцынскай дапамогi. Павышаныя надбаўкi вырашана выплачваць спецыялiстам тых напрамкаў медыцыны, якiя ўносяць важкi ўклад у знiжэнне смяротнасцi. Гэта кардыёлагi i анколагi. У прыватнасцi, ад 9 да 12 базавых — урачам-кардыяхiрургам аддзяленняў рэнтгена-эндаваскулярнай хiрургii (у залежнасцi ад катэгорыi). Урачы-кардыёлагi гарадскога кардыядыспансэра i раённых кардыялагiчных цэнтраў будуць атрымлiваць да акладаў ад 5 да 7 базавых велiчынь. Урачам i сярэдняму медперсаналу гарадскога клiнiчнага анкалагiчнага дыспансэра даплаты ўстаноўлены ў памеры ад 5 да 6 базавых. Штомесячныя даплаты да акладаў пачнуць выплачваць у Мiнску з 1 кастрычнiка.

Дэпутаты Мiнгарсавета прынялi рашэнне аб устанаўленнi надбаўкi ў памеры 30 працэнтаў да службовых акладаў участковых iнспектараў мiлiцыi i ўчастковых iнспектараў па справах няпоўнагадовых. Пасля павелiчэння акладу на 30 працэнтаў сярэдняя заработная плата ўчастковага ўзрасце з 860 тысяч да 1,1—1,2 мiльёна рублёў.

Больш за 300 тысяч мiнчан атрымаюць аднаразовую грашовую дапамогу ў памеры 3 базавых велiчынь на нарыхтоўку сельскагаспадарчай прадукцыi. Найперш гэта непрацуючыя пенсiянеры i iнвалiды (за выключэннем тых, хто знаходзiцца на поўным дзяржзабеспячэннi). Такое рашэнне прынята на сесii Мiнгарсавета.

Супрацоўнiкi Кастрычнiцкага РУУС г. Мiнска затрымалi групу асобаў, якiя падазраюцца ў ажыццяўленнi ў Мiнску некалькiх дзясяткаў кватэрных крадзяжоў. Папалiся зламыснiкi на Br4 тыс. У адной з кватэр у Мiнску яны ўкралi банкаўскую картку, каля якой на паперы быў напiсаны пiн-код. Затрыманыя знялi з карткi Br700 тыс., на рахунку засталося Br4 тыс. Праз некалькi гадзiн яны вырашылi зняць рэшткi сумы. Хаваючыся ад вiдэакамер, яны сталi здымаць грошы. У гэты час да iх падышоў знаёмы, якi нiчога не ведаў пра занятак зламыснiкаў i не хаваўся ад вiдэакамер. Праваахоўнiкi хутка ўстанавiлi асобы ўсiх удзельнiкаў i пачалi сачыць за iмi. Пасля чарговага крадзяжу на вулiцы Чарвякова яны былi затрыманыя. Як аказалася, група карысталася радыёстанцыямi, падчас злачынстваў зладзеi перасаджвалiся з адной дарагой машыны ў iншую i таму доўгi час былi няўлоўнымi.

nСоф’я Зноская стала пераможцай конкурсу на лепшага дворнiка Вiльнюса i атрымала ў якасцi прыза пуцёўку на Канары, куды яна накiруецца разам з сынам. Мэр горада ўручыў ёй чамадан i бiлеты. 64-гадовая жанчына была выбраная ў фiнале з 12 прэтэндэнтаў. Кошт пуцёўкi для дваiх — каля 1740 еўра.

Паводле паведамленняў карэспандэнтаў "Звязды" і інфармагенцтваў.