Попыт на айчынныя лекi працягвае расцi

Источник материала:

Удзельная вага новай прадукцыi — у агульным аб’ёме вытворчасцi склала за 9 месяцаў 16,3 працэнта. На ўнутраны рынак у першым паўгоддзi было пастаўлена iмпартазамяняльнай прадукцыi на 4,2 млн долараў. На экспарт — на 50 млн долараў.

Вытворцы не хаваюць, што перад iмi сёння стаiць вельмi няпростая задача: з аднаго боку, яны павiнны прывесцi да 2010 года сваю вытворчасць у адпаведнасць з мiжнароднымi стандаратмi GMР, iнакш пра экспартныя планы можна забыцца, але для гэтага патрабуюцца вельмi сур’ёзныя фiнансавыя сродкi, а з iншага — напоўнiць айчынны рынак таннымi беларускiмi лекамi, даступнымi для людзей з любымi даходамi.

Дырэктар РУП "Барысаўскi завод медыцынскiх прэпаратаў" Аляксандр Фандо прызнаўся, што яны збiраюцца да канца года акцыянаваць сваё прадпрыемства. І актыўна шукаюць сёння стратэгiчнага iнвестара.

— Размова iдзе пра вядомыя кампанii з абаротам некалькi мiльярдаў долараў, — патлумачыў Аляксандр Фандо.

Генеральны дырэктар РУП "Белфармацыя" Iгар Кавальчук з задавальненнем адзначыў, што давер пацыентаў да айчынных лекаў працягвае расцi, аб гэтым сведчыць i прырост на 20 працэнтаў у агульных аб’ёмах продажу. Дарэчы, усяго два тыднi таму Мiнiстэрствам аховы здароўя быў зацверджаны новы Пералiк лекавых сродкаў айчыннай вытворчасцi, абавязковых для наяўнасцi ў аптэках усiх формаў уласнасцi. Гэты дакумент скiраваны на забеспячэнне даступнасцi для насельнiцтва самых масавых i недарагiх лекавых прэпаратаў. Новы пералiк павялiчыўся на 61 найменне або на 31 працэнт у параўнаннi з папярэдняй яго рэдакцыяй.

— Магчыма, нашы лекi i прайграюць iмпартным па эфектнасцi сваёй упакоўкi, па колькасцi ўкладзеных у iх рэкламу сродкаў, але яны з’яўляюцца цудоўнай альтэрнатывай дарагiм замежным сродкам, — падкрэслiла начальнiк упраўлення фармацэўтычнай iнспекцыi i арганiзацыi лекавага забеспячэння Мiнiстэрства аховы здароўя Людмiла Рэуцкая..

Мiж iншым, у галоўным медыцынскiм ведамстве краiны не абвяргаюць магчымасцi з’яўлення ў Беларусi аналага "Аранжавай кнiгi", якая створана ў ЗША. Ёсць адна тэндэнцыя, на якой не прынята канцэнтраваць увагу — джэнэрыкi i традыцыйныя прэпараты складаюць у Беларусi 78 працэнтаў ад агульнай колькасцi лекаў. Для чытачоў патлумачым, што джэнэрыкi — гэта аналагi арыгiнальных лекавых сродкаў, на якiя закончыўся тэрмiн iх патэнтнай аховы.

Для прыкладу, ёсць венгерская но-шпа, а ёсць яе беларускi аналаг — дратаверына гiдрахларыд, якi на парадак больш танны, адпаведна, i больш даступны для пакупнiка. I ён, магчыма, зусiм не горшы за раскручаны брэнд. Хоць вельмi часта пацыенты становяцца ахвярамi агрэсiўнай рэкламы замежных кампанiй i даказваюць урачам, што iм дапамагаюць толькi iмпартныя лекi. I нават новая ўпакоўка на iмпартным сродку можа рэзка "пагоршыць" iх самаадчуванне.

I ўсё ж такi праблема бiяэквiвалентнасцi джэнэрыкаў арыгiнальным прэпаратам хвалюе сёння медыкаў у многiх краiнах свету. Яны прытрымлiваюцца той думкi, што хворым трэба прызначаць не тыя прэпараты, якiя павiнны лячыць, а тыя, якiя лечаць. Ёсць джэнэрыкi з даказанай эфектыўнасцю, а ёсць прэпараты, эфектыўнасць якiх трэба даказаць. У ЗША ў спецыяльнай "Аранжавай кнiзе" пералiчваюцца ўсе лекавыя сродкi з пазнакай, эквiвалетныя яны цi не арыгiнальнаму iнавацыйнаму прэпарату. I на падставе гэтай кнiгi складаюцца стандарты лячэння. А ўрач разам з пацыентам вырашаюць, якi прэпарат апошняму прызначаць: больш танны цi больш дарагi, менш цi больш эфектыўны. Вось вам ўся iнфармацыя аб праведзеных даследаваннях на бiяэквiвалентнасць, а вы ўжо самастойна вырашайце, колькi часу вы хочаце лячыцца — два-тры тыднi цi месяцы. Зразумела, з улiкам пакупнiцкай здольнасцi пацыента.

У РУП "Цэнтр экспертыз i выпрабаванняў у ахове здароўя" Мiнiстэрства аховы здароўя праводзяцца даследаваннi джэнэрыкаў на бiяэквiвалентнасць, таму ёсць надзея, што i беларусы праз колькi гадоў змогуць здзяйсняць цалкам iнфармаваны выбар.