Спадарожнiкi рэспiраторных захворванняў

Источник материала:

На думку дацэнта кафедры дзiцячых iнфекцыйных хваробаў Беларускага дзяржаўнага медыцынскага ўнiверсiтэта, кандыдата медыцынскiх навук Лiдзii МАТУШ, дарослым, якiя хочуць, каб iх дзецi радзей пакутавалi ад рэспiраторных захворванняў, неабходна мець на ўвазе некалькi рэчаў.

1. Вытрымлiванне правiлаў здаровага ладу жыцця ў сям’i. Укараненне загартоўвання, фiзiчнай культуры, рацыянальнага харчавання i рэжыму дня змяншаюць успрымальнасць дзiцячага арганiзма да вострых рэспiраторных захворванняў.

2. Узважанае стаўленне да пачашчанай захваральнасцi пры наведваннi дзiцячага садка. Справа ў тым, што пашырэнне кантактаў у сям’i, транспарце i тым жа садку непасрэдным чынам павышае ўспрымальнасць дзяцей да памянёных iнфекцый.

3. Экалогiя наваколля, у тым лiку жылля. Пад уздзеяннем раздражняльнiкаў, так званых аэрапалютантаў, павышаецца ступень бранхiяльнай гiперрэактыўнасцi. Спрыяе гэтаму, напрыклад, "пасiўнае" курэнне.

4. Самастойнае выкарыстанне розных лекавых прэпаратаў, напрыклад, антыбiётыкаў. Ужыванне любога лекавага прэпарата павiнна быць абгрунтаваным, таму не лянуйцеся наведваць урача.

5. Фактар развiцця дзiцяцi. Неданошанасць, анемiя, рахiт, морфафункцыянальная няспеласць, ранняе штучнае выкормлiванне — усё гэта адбiваецца на функцыянаваннi iмуннай сiстэмы, абарончых механiзмах дзiцяцi. Акрамя таго, сваю адмоўную ролю iграюць у гэтай справе ачагi хранiчнай iнфекцыi рота- i насаглоткi.

6. Наяўнасць алергii. Дзецi, якiя пакутуюць ад алергiчных захворванняў, часцей хварэюць на вострыя рэспiраторныя хваробы.

Дарэчы, на гэтыя фактары бацькам варта звярнуць увагу не толькi ў дачыненнi да дзяцей, але i ў дачыненнi да сябе.