Ніякiх нарматываў наконт колькасцi iнвентарнай тары ў магазiнах не iснуе...

Источник материала:

Гэта пытанне чытача мы пераадрасавалi спецыялiстам упраўлення абароны правоў спажыўцоў i кантролю за рэкламай Мiнiстэрства гандлю.

— Якiх-небудзь нарматыўных патрабаванняў да колькасцi iнвентарнай тары, ячэек для захоўвання асабiстых рэчаў заканадаўствам не ўстаноўлена, — адказалi рэдакцыi. — Аднак калi такiя ячэйкi занятыя, спажывец мае права знаходзiцца ў гандлёвай зале i з пакетамi, сумкамi i г.д. Правiлы гандлю такой забароны не ўтрымлiваюць.

Што да iнвентарнай тары, дык пры продажы тавараў метадам самаабслугоўвання ў прадуктовых магазiнах адбор пакупнiкамi тавараў праводзiцца ў кошыкi, вазкi i iншыя падобныя сродкi, прызначаныя для транспарцiроўкi тавараў у такiх магазiнах самаабслугоўвання. Адабраныя пакупнiком тавары павiнны знаходзiцца ў iнвентарнай тары да iх аплаты, сказалi нам у мiнiстэрстве. Ну дык а калi гэтай самай тары няма, як заўважыў чытач?

— Адзiнае, што застаецца пакупнiку, гэта дачакацца, калi якi-небудзь спажывец, разлiчыўшыся, мiнуе касу i вызвалiць ад набытага тавару той самы iнвентарны кошык, — адказалi спецыялiсты ўпраўлення абароны правоў спажыўцоў i кантролю за рэкламай. — Яшчэ ён можа пакiнуць сваю прапанову аб павелiчэннi колькасцi iнвентарнай тары, зрабiўшы запiс у Кнiзе заўваг i прапаноў. Аднак канкрэтнае рашэнне па ёй будзе прымаць адмiнiстрацыя, уладальнiк магазiна. Паколькi, як мы ўжо сказалi, нiякiх нарматыўных патрабаванняў да колькасцi iнвентарнай тары няма, уладальнiк можа палiчыць, што яе — дастаткова (а пэўныя праблемы ўзнiкаюць толькi ў "гадзiны пiк"), i нiчога не мяняць у гэтым накiрунку.