Рознічная цана найперш залежыць ад узроўню закупачнай

Источник материала:

— Узровень рознiчных цэнаў у гандлi можа залежаць ад некалькiх фактараў, але найперш — ад узроўню закупачных цэнаў: па якiм кошце прадукцыя прапануецца пастаўшчыком, вытворцам, i па якой цане яе згодны набываць прадавец. Тут аказвае свой уплыў i якасць прадукцыi, тых жа яблыкаў. Пагадзiцеся, у нас даволi шмат не бедных, скажам так, людзей, якiя могуць дазволiць сабе набываць пэўныя тавары, прад’яўляючы да iх i ўласныя патрабаваннi па якасцi. З iншага боку магазiн, калi набудзе прадукцыю па занадта вялiкай закупачнай цане, рызыкуе яе ў далейшым не рэалiзаваць. Гандлёвая надбаўка iстотнага ўплыву на рознiчную цану не аказвае, паколькi на iмпартныя тавары, у тым лiку i плодаагароднiнную прадукцыю, куды адносяцца i яблыкi, яна абмяжоўваецца аблвыканкамамi. Па рэгiёнах могуць быць нейкiя адрозненнi, але ў сярэднiм яна складае 20—25 працэнтаў. Паўтаруся, найперш усё залежыць ад закупачнай цаны, якую лiчаць для сябе прымальнымi два бакi — прадавец i пакупнiк.

— На мiжсезонны перыяд 2008—2009 гадоў у цэлым па краiне планавалася закласцi на захоўванне 9,4 тысячы тон яблыкаў, фактычна ж закладзена 9,5 тысячы тон. Да прыкладу, летась "па факце" было толькi 5,4 тысячы тон. Такiм чынам, сёлета яблыкаў закладзена 175 працэнтаў да ўзроўню мiнулага года. Таму гаварыць, што танных беларускiх яблыкаў у гандлi няма, не выпадае. Ды i тыя ж iмпартныя можна набыць не па 7 тысяч, а, напрыклад, за 4 тысячы рублёў за кiлаграм. У кожнага гандлёвага аб’екта ёсць узгоднены ў мясцовым выканкаме асартыментны пералiк тавараў, якiя абавязкова павiнны прысутнiчаць у продажы. У яго ўключана i пазiцыя "агароднiна-садавiна", у тым лiку i айчыннай вытворчасцi. Таму ў кожным канкрэтным выпадку трэба асобна высвятляць: чаму ў дадзены момант у продажы не было той цi iншай прадукцыi. Той жа супермаркет разлiчаны на задавальненне патрэбаў усiх катэгорый насельнiцтва, у iм павiнна быць прадукцыя i тавары на любы густ i таўшчыню партманета. Калi ж пакупнiк заўважыў, што нейкая прадукцыя, тыя ж беларускiя яблыкi, адсутнiчаюць на палiцах гандлёвага прадпрыемства працяглы час, лепшы спосаб выправiць сiтуацыю: звярнуцца афiцыйна ў выканкам па месцы жыхарства са скаргай.